„რეალურად, არ დგას დღის წესრიგში სამხედრო ბაზების შემოყვანის საკითხი“, - განაცხადა საპარლამენტო უმრავლესობის ერთ-ერთმა ლიდერმა, თამარ ჩუგოშვილმა შეკითხვის პასუხად, აზიანებს თუ არა საქართველო-ამერიკის ურთიერთობას, პრეზიდენტის მიერ სამხედრო ბაზებთან დაკავშირებით გაკეთებული განცხადება.
„ამ საკითხის დღის წესრიგში დაყენება, ვფიქრობ, არ იყო საჭირო. არ ვიცი, ეს საიდან გაჩნდა. რეალურად, არ დგას დღის წესრიგში სამხედრო ბაზების შემოყვანის საკითხი. არ მგონია, რომ ეს კარგია. რაც შეეხება ჩვენს დამოკიდებულებას აშშ-ის სამხედრო თანამშრომლობის კუთხით, ვფიქრობ, საკმაოდ ნათელია სახელმწიფოს პოზიცია," - განაცხადა ჩუგოშვილმა.
„არ მგონია, ეს რეკომენდებული იყოს“, - ასე უპასუხა საქართველოს პრეზიდენტმა სალომე ზურაბიშვილმა „ამერიკის ხმის“ კითხვას, თუ რას ფიქრობს საქართველოში ამერიკული ბაზის აშენებაზე.
„ვფიქრობ, ეს ქვეყანა ისეთ ადგილზე მდებარეობს, სადაც უსაფრთხოება უნდა გავაძლიეროთ. არაა საჭირო გადავდგათ ნაბიჯები, რომლებიც შეიძლება პროვოკაციად იქნას აღქმული და ამასთან, არ მგონია შეერთებული შტატები აქ სამხედრო ბაზის ქონისთვის მზად იყო, რაც ყურადღებას მიიქცევს არა მხოლოდ რუსეთისგან, არამედ ტერორისტული მოძრაობებისგანაც, რომლებიც ჩვენს რეგიონში ძალიან აქტიური არიან. ჩვენს შორის არსებული ურთიერთგაგების საფუძველზე, უნდა გავაღრმაოთ და გავაფართოვოთ თანამშრომლობა და არ გადავდგათ ნაბიჯები, რომლებმაც შესაძლოა სხვების რეაქციის პროვოცირება გამოიწვიოს“, - განაცხადა სალომე ზურაბიშვილმა.
