პარლამენტში „თემატური მოკვლევის ჯგუფი“ შეიქმნება, რომელიც შრომის უსაფრთხოების საკითხებს დეტალურად შეისწავლის და მათზე შესაბამის რეაგირებას მოახდენს, - ამის შესახებ ინფორმაციას პარლამენტის პრესსამსახური ავრცელებს.
უწყების ცნობით, საკომიტეტო მოკვლევის შესახებ გადაწყვეტილება ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე მას შემდეგ მიიღეს, რაც სხვადასხვა უწყების მიერ წარმოდგენილი შუალედური ანგარიშების მიხედვით, შრომის უსაფრთხოების მიმართულებით მრავალი გამოწვევა დაფიქსირდა.
„ჩვენ გავამკაცრეთ რეგულაციები, შევცვალეთ კანონი, თუმცა კიდევ უფრო ბევრი უნდა ვიმუშაოთ, რათა ჩვენს ქვეყანას არ ჰყავდეს სამუშაო ადგილებზე დაღუპული ადამიანები. მივიღეთ გადაწყვეტილება, „თემატური მოკვლევის ჯგუფის“ შექმნის შესახებ, რომელიც საპარლამენტო ზედამხედველობის ერთ-ერთ მნიშვნელოვან ბერკეტს წარმოადგენს“, - განაცხადა ადამიანის უფლებათა დაცვის კომიტეტის თავმჯდომარემ სოფო კილაძემ.
