ფრაქცია „პატრიოტთა ალიანსი და სოციალ-დემოკრატების“ თავმჯდომარემ, გიორგი ლომიამ შს მინისტრს გიორგი გახარიას მიმართა, რომ ჰომოფობიასთან ბრძოლის დღეს ლგბტ თემს მსვლელობა არ გაამართინოს.
პარლამენტში, სადაც გიორგი გახარიას მინისტრის საათის ფარგლებში უსმენენ, ლომიამ განაცხადა, რომ საქართველოს პატრიარქმა 17 მაისი ოჯახის სიწმინდის დღედ დააწესა და თემის გამოსვლა ქუჩაში ვნებათაღელვას გამოიწვევს. ამიტომ დეპუტატმა გახარიას სთხოვა, რომ ეს არ დაუშვას.
„პოლიცია უნდა იყოს სიმშვიდის გარანტი და მე მინდა გთხოვოთ, რომ ითამაშოთ მედიატორის როლი, დაელაპარაკოთ ამ მსვლელობის ორგანიზატორებს, რომ უარი თქვან მსვლელობაზე, რათა ამან არ გამოიწვიოს ვნებათაღელვა ქვეყანაში.
სთხოვოთ, რომ გამოუყობთ ადგილს, სადაც ისინი შეგროვდებიან. ოღონდ ის ადგილი, რომელსაც გამოუყოფთ, არ უნდა იყოს დაკავშირებული არც ქვეყნის გამარჯვებებთან და არც ჩვენს სიწმინდეებთან“, - განაცხადა პლენარულ სხდომაზე გიორგი ლომიამ.
„პატრიოტთა ალიანსის“ წევრმა ასევე განაცხადა, რომ საპატრიარქოს მიმართ შავი პიარკამპანია მიმდინარეობს, რომლის უკანაც მისი აზრით, არასამთავრობო ორგანიზაციები დგანან და წუხილი გამოთქვა, რომ ეს კამპანია შინაგან საქმეთა სამინისტრომ ვერ გამოააშკარავა.
„საპატრიარქოს მიმართ მიმდინარეობს შავი პიარკამპანია. ამ კამპანიის უკან დგანან არასამთავრობო ორგანიზაციები, ცალკეული მოქალაქეები და სამწუხაროდ, ჩართულები არიან მედიასაშუალებები. ამ ყველაფერზე იხარჯება ძალიან დიდი ფული. სამწუხაროა, რომ დღემდე ვერ გამოავლინეთ ვინ დგას ამ შავი პიარის უკან და დღემდე არ არიან ისინი დასჯილები“, - თქვა გიორგი ლომიამ.
