ბათუმის საქალაქო სასამართლოს მოსამართლე ჯუმბერ ბეჟანიძემ არ დააკმაყოფილა შუამდგომლობა, შეეჩერებინა აჭარის ტელევიზიის დირექტორის შესარჩევი კონკურსი. შუამდგომლობაზე მოსამართლემ სხდომის გამართვის გარეშე იმსჯელა. საქმის არსებითი განხილვა ჯერ არ დაწყებულა.
ბათუმის საქალაქო სასამართლოში სარჩელი ნათია კაპანაძემ შეიტანა. ის მისთვის უნდობლობის საკითხზე მიღებული გადაწყვეტილების ბათილად ცნობას, თანამდებობაზე აღდგენას, იძულებითი განაცდურის ანაზღაურებასა და დირექტორის პოზიციაზე გამოცხადებული კონკურსის ბათილად ცნობას მოითხოვს. კაპანაძის ინტერესებს სასამართლოში საია იცავს.
ნათია კაპანაძე აჭარის ტელევიზიის დირექტორის თანამდებობიდან 19 აპრილს გაათავისუფლეს. მაუწყებლის სამეთვალყურეო საბჭოს ხუთი წევრიდან 4-მა კაპანაძის თანამდებობიდან ვადამდელ გათავისუფლებას მის მიმართ უნდობლობის გამოცხადების გზით დაუჭირა მხარი.
