საქართველოს პარლამენტმა დაამტკიცა ცვლილება, რომლის მიხედვითაც, 12 მაისი ღვთისმშობლის წილხვედრობის დღედ გამოცხადდა.
როგორც ადამიანის უფლებების კომიტეტის თავმჯდომარემ, სოფიო კილაძემ განაცხადა, საკითხს, რომ ქვეყანა არის ღვთისმშობლის წილხვედრი ქვეყანა, სიმბოლური დატვირთვა აქვს და მნიშვნელოვანია, საქართველო ასევე ოფიციალურად გამოვაცხადოთ ღვთისმშობლის წილხვედრ ქვეყნად.
თეოლოგი ბექა მინდიაშვილი წერს, რომ ღვთისმშობლის წილხვედრად სახელმწიფოს, ერის გამოცხადება არის საქართველოს საპატრიარქოსა და ხელისუფლების უმეცრების, ამპარტავნების, ქრისტეს მოძღვრებისგან განდგომის უმძიმესი ცოდვა.
„ქართული მესიანიზმი, მითი იმის შესახებ, რომ ქართველი ერი არის გამორჩეული სხვა ერთა შორის, ერესი და მკრეხელობაა, რადგან ახალი აღთქმა არაორაზროვნად უაყოფს რომელიმე ერის გამორჩეულობის, უპირატესობის დოქტრინას, მეტიც, - უარყოფს ღმერთის წინაშე ერების რელიგიურ მნიშვნელობას, რადგან, ამავე მოძღვრების თანახმად, ღვთის მფარველობით კონკრეტული პიროვნება სარგებლობს და არა - ერი. როგორც მოციქული პავლე წერს, „ ყოველნი შვილნი ღმრთისანი ხართ სარწმუნოებითა ქრისტე იესუჲსითა. რამეთუ რაოდენთა ქრისტეს მიმართ ნათელ-იღეთ, ქრისტე შეიმოსეთ. არა არს ჰურიაება, არცა წარმართება; არა არს მონება, არც აზნაურება; არა არს რჩევა მამაკაცისა, არცა დედაკაცისა, რამეთუ თქუენ ყოველნი ერთ ხართ ქრისტე იესუჲს მიერ (გალატელთა, 3. 25 - 28)," - წერს ბექა მინდიაშვილი.
