გუშინ, 8 მაისს საქართველოს პარლამენტმა დაამტკიცა ცვლილება, რომლის მიხედვითაც, 12 მაისი ღვთისმშობლის წილხვედრობის დღედ გამოცხადდა.
ცვლილების ინიციატორი საქართველოს მთავრობაა. კანონპროექტის განმარტებით ბარათში ჩვენ ვეცნობით მიზეზებს, თუ რატომ გახდა აუცილებელი კანონპროექტის მიღება, ასევე პრობლემებს, რომლის გადაჭრასაც კანონპროექტი ისახავს მიზნად.
საქართველოს პარლამენტის ვებგვერდზე გამოქვეყნებულ განმარტებით ბარათში ვკითხულობთ:
„საქართველოს საპატრიარქოს მიერ მოწოდებული ინფორმაციის თანახმად, ჩვენი ქვეყნის უმთავრესი მატიანე „ქართლის ცხოვრება“ გვაუწყებს შემდეგს: „შემდგომად უფლის ამაღლებისა, რაჟამს მოციქულებმა წილი ყარეს, საქართველოს მოქცევა წილად ხვდა ყოვლადწმინდა ღვთისმშობელს.
ივერიაში სამოგზაუროდ განმზადებულ ზეციურ დედოფალს გამოეცხადა უფალი და უბრძანა, რომ დარჩენილიყო იერუსალიმში, ხოლო საქართველოში თავისი ხელთუქმნელი ხატით წარმოეგზავნა მოციქული ანდრია პირველწოდებული.
ხელთუქმნელი ხატის, შემდგომში აწყურისად წოდებულის, შესახებ მაცხოვარმა ბრძანა, რომ იგი ღვთისმშობლის წილ ანუ მის ნაცვლად დამკვიდრდებოდა ქართველთა მცველად უკუნისამდე ჟამთა ანუ ვიდრე ქვეყნის აღსასრულამდე.“
ბარათში ვკითხულობთ, რომ 2 ათასი წლის განმავლობაში ღვთისმშობლისადმი საქართველოს წილხვდომილობის რწმენამ დიდწილად განსაზღვრა საქართველოს თვითმყოფადობა, კულტურა და ისტორია. საქართველოს მოსახლეობისთვის ღვთისმშობლის წილხვდომილობა წარმოადგენს უმნიშვნელოვანეს მოვლენას და შესაბამისად - ეროვნულ დღესასწაულს.
„ღვთისმშობელი საქართველოს მართლმადიდებელთათვის მუდამ იყო, არის და იქნება ქვეყნის გადარჩენის უპირველესი საწინდარი, სიმბოლო ურყევი სასოებისა - ანუ იმედისა". - მიიჩნევს საქართველო მთავრობა.
„შესაბამისად, სრულიად ბუნებრივი და კანონზომიერი იქნება, რომ ღვთისმშობლისადმი საქართველოს წილხვდომილობის დღესასწაულს დაერქვას - იმედის დღე". - ვკითხულობთ ოფიციალურ დოკუმენტში.
