პრემიერ მინისტრმა მამუკა ბახტაძემ უვიზო მიმოსვლის შეჩერების საფრთხესთან დაკავშირებით ჟურნალისტების კითხვებს უპასუხა. მისი თქმით, საუბრები იმაზე, რომ საქართველოს შეიძლება ვიზალიბერალიზაცია შეუჩერდეს, არის სრულიად საფუძველს მოკლებული.
„ეს სიმართლეს არ შეესაბამება, ისევე როგორც ბევრი სხვა რაღაც, რის აჟიტირებასაც ცდილობენ. როდესაც ჩვენ ვსაუბრობთ ვიზალიბერალიზაციაზე, როდესაც ჩვენ ვსაუბრობთ ასოცირების ხელშეკრულებაზე ევროპასთან, ეს არ გახლავთ ვინმეს მონაპოვარი. ეს არის ქართული სახელმწიფოს მონაპოვარი, ჩვენ განსაკუთრებით უნდა გავუფრთხილდეთ ამას და საქართველოს თითოეული მოქალაქე უნდა იყოს განსაკუთრებული პასუხისმგებლობით განმსჭვალული, როდესაც ჩვენ ვდგამთ ნაბიჯებს და ვსარგებლობთ ამ ძალიან დიდი სარგებლით. რა თქმა უნდა, ეს პროცესი მიმდინარეობს, მაგრამ კიდევ ერთხელ მსურს ყველა დავარწმუნო, რომ საუბრები იმაზე, რომ საქართველოს შეიძლება ვიზალიბერალიზაცია შეუჩერდეს, არის სრულიად საფუძველს მოკლებული”, - განაცხადა პრემიერმა.
