ჰომოფობიასა და ტრანსფობიასთან ბრძოლის საერთაშორისო დღესთან დაკავშირებით სახალხო დამცველი განცხადებას ავრცელებს.
ომბუდსმენის თქმით, უსაფრთხოების გარანტიების არარსებობის გამო, ლგბტ+ თემი წელს 17 მაისს ღიად ვერ აღნიშნავს. ეს კი უკან გადადგმული ნაბიჯია თემის უფლებრივი მდგომარეობის გაუმჯობესების, გამოხატვისა და შეკრების თავისუფლების რეალიზების გზაზე.
სახალხო დამცველის განცხადებით, ამ დღის აღნიშვნის მიზანი ძალადობის დაგმობა და ლგბტ+ ადამიანების მიმართ სოლიდარობის გამოხატვაა, თუმცა ბოლო წლებში ჰომოფობიასა და ტრანსფობიასთან ბრძოლის საერთაშორისო დღის აღნიშვნა საქართველოში ძირითადად ძალადობრივ ქმედებებს უკავშირდება და საფრთხის ქვეშ აყენებს ადამიანების უსაფრთხოებას.
ომბუდსმენი მიიჩნევს, რომ სახელმწიფოს ღონისძიებები ლგბტ+ ადამიანების დასაცავად არასაკმარისია და ვერ პასუხობს რეალურ გამოწვევებს. სახელმწიფოს ამ დრომდე არ გააჩნია ლგბტ+ პირთა უფლებრივი მდგომარეობის გაუმჯობესების სისტემური ხედვა.
„სამწუხაროა, რომ ლგბტ+ პირთა უფლებრივი მდგომარეობა ქვეყანაში არსებითად არ შეცვლილა. საზოგადოებაში კვლავ ძლიერია ჰომოფობია და ანტიგენდერული ჯგუფების გავლენა, რის გამოც ლგბტ+ ადამიანები განიცდიან ჩაგვრას, დისკრიმინაციას და ხშირად ხდებიან ძალადობის მსხვერპლნი.
ამასთან, საზოგადოების დიდ ნაწილში არსებული ჰომოფობიური და ტრანსფობიური განწყობების გამო, ლგბტ+ პირებისთვის პრობლემას წარმოადგენს შრომის, ჯანდაცვის, სოციალური დაცვის და განათლების უფლებებით დაუბრკოლებლად სარგებლობა“, - ნათქვამია სახალხო დამცველის განცხადებაში.
ომბუდსმენის თქმით, აუცილებელია, გენდერული თანასწორობისკენ მიმართულ ეროვნულ სამოქმედო გეგმებში აისახოს ლგბტ+ პირების, როგორც ერთ-ერთი ყველაზე მოწყვლადი ჯგუფის უფლებების დღის წესრიგი.
ლგბტ+ უფლებებზე მომუშავე ორგანიზაციები კი თემის პრობლემების გადაჭრის მიზნით სისტემური ხედვის ჩამოყალიბების ყველა ეტაპზე უნდა ჩაერთვნენ.
