სამეგრელო-ზემო სვანეთის საოლქო პროკურატურაში დეპუტატ გია დანელიას დაკითხვა დასრულდა. როგორც თავად ჟურნალისტებთან აცხადებს, ვიდეოჩანაწერში ესაუბრებოდა პაციენტს, რომელსაც კბილის პროთეზირება გაუკეთა.
„15 წლის წინ გავუკეთე კბილების პროთეზირება, მან დაახლოებით ორ წელიწადნახევრის წინ დამირეკა და მითხრა, სურვილი მაქვს კონსულტაციისო, ჩვენ პოლიკლინიკის წინ ვისაუბრეთ დაახლოებით 30 წუთი, ასევე ვისაუბრეთ თხილის შეწამვლაზე და სხვა თემებზე. ვინაიდან ის იყო ჩემი თანასოფლელი მასთან ყოველთვის მქონდა ნორმალური ურთიერთობა. ვიდეოს რომ გადახედოთ, ეს არ არის ერთი ტექსტი, ეს არის მონტაჟი, ვაპირებ ჩემი უფლებების დარღვევის და ასევე ხელისფლების დისკრედიტაციის წინააღმდეგ ბრძოლას, ეს არის „ნაცბანდის“ ხელწერა“, - განაცხადა დანელიამ
14 მაისს „კურიერმა" ავტომანქანაში გადაღებული ჩანაწერი გაავრცელა, რომელშიც, სავარაუდოდ, „ქართული ოცნების“ წევრი მეორე პირს უხსნის, თუ რა დავალებები „მოვიდა ზევიდან".
„თათბირზე ვიყავი ახლა და თბილისიდან იყო წარმომადგენელი. კაროჩე, ნებისმიერი მეთოდით იმუშავეთო, ტერორით, დედა... მოსყიდვა - მოისყიდეთო, გასატაცებელია - ყველაფერზე თანხმობაა მიცემულიო", - ისმის „კურიერის" ჩანაწერში.
ვიდეოჩანაწერის თანახმად, „ქართული ოცნება", სავარაუდოდ, ოკუპირებულ გალის რაიონში არჩევნებში გამარჯვების მიზნით კრიმინალურ ავტორიტეტებთან თანამშრომლობს.
„გალელ მაყურებლებს უნდა შევხვდე დღეს, გამიგე? მაგიტომ გამოვედი. გუშინ ინფორმაცია მივიღე, საზღვარი იკეტება. 30 კაცი გადმოდის. რა ჰქვია იმას, ოთარ თორდია და გიზო. ესენი ამ კაცს დაუკავშირდნენ და გადმოდიან.
დაიკეტება და იქით ხალხს დავკარგავთ. მითხრეს, რომ 30 კაცი გარანტირებული იყო" - ისმის ჩანაწერში.
პირი, რომელიც, სავარაუდოდ, ჩანაწერში ჩანს, „რუსთავი 2-თან" საუბარში ჩანაწერის ავთენტურობას უარყოფს: „ჩემი ხმა არ არის, ფალსიფიცირებულია, ეს მე არ ვარ".
