სახელმწიფო აუდიტის სამსახური შუალედური არჩევნების ფინანსური აქტივობების მონიტორინგის შუალედურ ანგარიშს აქვეყნებს.
2019 წლის 19 მაისის არჩევნებში მონაწილეობას იღებს 18 პარტია, 1 ბლოკი და 20 დამოუკიდებელი კანდიდატი.
ანგარიშის მიხედვით, პოლიტიკური პარტიებისა და დამოუკიდებელი კანდიდატების მიერ 20 მარტიდან 30 აპრილის ჩათვლით პერიოდში მიღებულია 2 844 372 ლარის შემოსავალი, საიდანაც დაახლოებით 60%-ს შემოწირულებები შეადგენს.
აქედან, ყველაზე მეტი შემოსავალი მიიღო პარტია „ქართული ოცნება დემოკრატიულმა საქართველომ“, სულ 1 847 089 ლარია. ამ თანხიდან შემოწირულობებმა შეადგინა 1 589 500 ლარი, საბიუჯეტო შემოსავალმა - 173 420 ლარი, მიზნობრივმა დაფინანსებამ - 84 169 ლარი.
„ქართული ოცნების“ შემდეგ ყველაზე მეტი დაფინანსება „ერთიანმა ნაციონალურმა მოძრაობამ“ (ჯამში 190 085 ლარია) და „ევროპულმა საქართველომ“ (183 548 ლარი) მიიღო.
პოლიტიკური პლატფორმა - ახალი საქართველოს მაჟორიტარობის კანდიდატმა ლევან იოსელიანს შემოწირულობები არ მიუღია. საბიუჯეტო და მიზონბრივი სადფინანსებით სულ 37 335 ლარი მიიღო.
დამოუკიდებელმა კანდიდატმა გრიგოლ გეგელიამ სულ 4, 095 ლარი მიიღო. ეს თანხა მხოლოდ შემოწირულობებია, სხვა შემოსავალი მას არ მიუღია.
პოლიტიკური პარტიებისა და დამოუკიდებელი კანდიდატების მიერ 20 მარტიდან 30 აპრილის ჩათვლით პერიოდში დაიხარჯა სულ 1 903 023 ლარი, რაც ძირითადად რეკლამებსა და შრომის ანაზღაურებაზე ნაწილდება.
