სახელმწიფო აუდიტის სამსახური შუალედური არჩევნების ფინანსური აქტივობების მონიტორინგის შუალედურ ანგარიშს აქვეყნებს.
სახელმწიფო აუდიტის სამსახურმა საარჩევნო კამპანიის პერიოდში წინასაარჩევნო და გასულ პერიოდში განხორციელებულ ქმედებებზე თბილისის საქალაქო სასამართლოში 6 ადმინისტრაციული სამართალდარღვევის საქმე გადააგზავნა.
აქედან, 3 საქმე პარტია „გირჩის“ სახელზეა:
- წლიური დეკლარაციებში აღმოჩენილი კანონით დადგენილი წესის დარღვევით მიღებული შემოწირულება (მოთხოვნილი სანქცია 8 300 ლარი)
- საარჩევნო კამპანიის ფონდის შესახებ ინფორმაციის წარმოუდგენლობა (სანქცია 1500 ლარი)
- 3-კვირიანი დეკლარაციების წარმოდგენის კანონით დადგენილი ვალდებულების დარღვევა (2 000 ლარი)
აღსანიშნავია, რომ მიმდინარე წლის 8 აპრილს „გირჩმა" სახელმწიფო აუდიტის სამსახურის გენერალურ აუდიტორს, ირაკლი მექვაბიშვილს მიმართა. როგორც პარტია სახელმწიფო აუდიტის სამსახურის საპასუხო წერილში მიუთითებდა, მისთვის მიუღებელი იყო აუდიტის მიერ დადგენილი რეგულაციები.
„ჩვენი აზრით ე.წ. ,,პოლიტიკური ფინანსების” ეფექტური მონიტორინგი ზოგადად არის შეუძლებელი. საქართველოში ეს სისტემა შემუშავებულია სპეციალურად ერთი კონკრეტული მიზნისთვის - რომ ოპოზიციურად განწყობილმა პოლიტიკურმა ძალებმა ვერ შეძლონ ხელისუფლებაში მოსასვლელად საჭირო ფინანსური რესურსის მობილიზება. არასოდეს ამ ქვეყნის ისტორიაში ამ სისტემას არ დაუსჯია რეალურად ხელისუფლებაში მყოფი პოლიტიკური ძალა და თუ ვინმესთვის ოდესმე შეუქმნია რეალური პრობლემა, ეს ყოველთვის იყო ოპოზიციურად განწყობილი პოლიტიკური ძალები (მათ შორის დღეს ხელისუფლებაში მყოფი პოლიტიკური ძალაც)", - ნათქვამია იყო „გირჩის" წერილში.
გარდა ამისა, „გირჩი" აცხადებს, რომ ყველასთვის ვინც ოდნავ მაინც დაინტერესებულია ქართული პოლიტიკით, ცნობილია რომ ამ სფეროში ტრიალებს უამრავი „შავი ფული", გასაგებია რომ ყოველი არჩევნების წინ მმართველი პოლიტიკური გუნდის სასარგებლოდ 1 დღეში მილიონების შეგროვება არ არის ბუნებრივი ამბავი, პრაქტიკულად ეუთოს სადამკვირვებლო მისიის მიერ დადასტურებულია რომ ბოლო საპრეზიდენტო არჩევნების წინ 600,000-მდე ადამიანისთვის სესხების ჩამოწერის დაპირება, წარმოადგენდა ამომრჩევლის მოსყიდვის ფაქტს, და ეს ყველაფერი თქვენი უწყების მხრიდან რჩება რეაგირების გარეშე.
„გირჩისთვის", რომელიც ერთადერთი პარტიაა ამ ქვეყნაში რომელიც სრულად შემოწირულობებით არსებობს და პრინიციპულად უარს ამბობს საბიუჯეტო დაფინანსების ოდესმე მიღებაზე, რაღაც ფორმების შევსების და სამ კვირაში ერთხელ წარდგენის დავალდებულება, არის თავხედობასთან მოსაზღვრე ცინიზმი. ვაფასებთ ამ ცინიზმს, მაგრამ არ ვაპირებთ ამ სპექტაკლში მონაწილეობას", - აღნიშნავდა „გირჩი" და აუდიტს გამოსავალს სთავაზობდა, - „თუ ჩაატარებთ საქართველოს მართლმადიდებელი სამოციქულო ეკლესიის საპატრიარქოს აუდიტს და საჯაროდ დაგვარწმუნებთ რომ ეს საქმე კეთილსინდისიერად გააკეთეთ, ჩვენ შევასრულებთ სპექტაკლში ერთ-ერთ როლს და გადმოგიგზავნით სახელმწიფო აუდიტის სამსახურის გენერალური აუდიტორის 2016 წლის 5 მაისის #2915/21 ბრძანებით დადგენილ ფორმებს".