გორში სეტყვით დაზარალებულები მერიასთან აქციას მართავენ. აქციის მონაწილეები მერიის წარმომადგენელთან, გუბერნატორთან და სოფლის მეურნეობის მინისტრთან შეხვედრას ითხოვენ. როგორც „ლიბერალთან“ საკრებულოს წევრი „ნაციონალური მოძრაობიდან“ ვასილისა ჯაბახიძე ამბობს, ამ წუთებში აქციის მონაწილეები ავტომაგისსტრალისკენ მიემართებიან და გზის გადაკეტვას გეგმავენ, რათა „მთავრობის ყურადღება მიიქციონ“. აქცის მონაწილეები სეტყვისგან მიყენებული ზარალის ანაზღაურებას ითხოვენ.
რადიო „მოზაიკას“ გავრცელებული ინფორმაციით, გორის მუნიციპალიტეტის მერი, კონსტანტინე თავზარაშვილი აცხადებს, რომ გორის მერიას სეტყვისაგან დაზარალებულების დახმარება არ შეუძლია.
„ბევრ სოფელში იყო სეტყვა. ჯერჯერობით, არაა დათვლილი რა ზარალი მიიღო მუნიციპალიტეტმა. სამწუხაროდ, გორის მუნიციპალიტეტის მერიას სეტყვისაგან დაზარალებულების დახმარება არ შეუძლია", - განაცხადა გორის მერმა, კონსტანტინე თავზარაშვილმა.
როგორც „ლიბერალს“ გორის მუნიციპალიტეტის მერიის პრესსამსახურში განუცხადეს, დღეს, 16 საათზე მერი სოფლის მეურნეობის მინისტრთან ერთად დაზარალებულებს შეხვდება.
ფოტო: რადიო „მოზაიკა“
