ორგანიზაცია „ადამიანის უფლებათა ცენტრი“ ხორავას ქუჩაზე მოკლული მოზარდების საქმის თბილისის სააპელაციო სასამართლოში განხილვას აფასებს. ხორავას ქუჩაზე მოკლული მოზარდების საქმის განხილვა თბილისის სააპელაციო სასამართლოში დასასრულს უახლოვდება. გადამწყვეტი სიტყვა დღეს სააპელაციო სასამართლომ უნდა თქვას.
ადამიანის უფლებათა ცენტრის იურისტმა, ნესტან ლონდარიძემ, რომელიც გამოძიების დაწყებიდან იცავს დაზარალებულ ზაზა სარალიძის ინტერესებს, მოამზადა დოკუმენტი, რომელშიც წარმოდგენილია მოწმეთა ჩვენებების ანალიზი.
„სამწუხაროა, მაგრამ დღესაც შინაგან საქმეთა სამინისტრო და პროკურატურა არ არიან ადეკვატურები 2017 წლის 1 დეკემბერს, თბილისში, ხორავას ქუჩაზე არასრულწლოვანთა მკვლელობის საქმესთან დაკავშირებით, რაზეც ნათლად მეტყველებს ის ფაქტი, რომ, ერთი მხრივ, პროკურატურა მთელი ძალით ცდილობს, გაიტანოს პირვანდელი ბრალდება სააპელაციო სასამართლოში, ხოლო, მეორე მხრივ, ქმედითი ნაბიჯები არ გადადგმულა ძირითადი საქმიდან გამოყოფილ საქმეზე (გამოყოფილი საქმე ეხება შეუტყობინებლობისა და მოწმეთა მიმართ განხორციელებული ზემოქმედების ფაქტს)“,- აცხადებენ ორგანიზაციაში.
