პარლამენტის წინ შეკრებილ საზოგადოებას აქციის მოდერატორმა მიშა მშვილდაძემ მიმართა. მისი თქმით, აქცია გაგრძელდება, ვიდრე ყველა მსურველი ტრიბუნიდან საკუთარ პოზიციას არ გამოხატავს. მშვილდაძემ ხვალინდელი აქციაც დააანონსა - ხვალ, პარლამენტის წინ საპროტესტო გამოსვლები 7 საათიდან განახლდება და გაგრძელდება მანამდე, სანამ ყველა მოთხოვნა არ შესრულდება.
„ხელისუფლებისგან არ მიგვიღია არანაირი პასუხი ჩვენს მოთხოვნებზე, ეს ნიშნავს ორ რამეს: პირველი - ჩვენი ბრძოლა იქნება ხანგრძლივი და მეორე - ჩვენ აუცილებლად გავიმარჯვებთ მშვიდობიანი გზებით ძალადობის გარეშე, სიტყვის, იდეისა და ერთობის ძალით!“ - განაცხადა მშვილდაძემ
მშვილდაძის თქმით, თუკი ხვალ, 7 საათამდე დაკავებულებს არ გაათავისუფლებენ, „მერე უკვე გვექნება უფლება, რომ ავირჩიოთ მათთვის [ხელისუფლებისთვის] გასაგები მეთოდები იმისათვის, რომ ჩვენი სამართლიანი, ლოგიკური სამშობლოსთვის საჭირო მოთხოვნები აუცილებლად შესრულდეს“.
აქციის მონაწილეების მოთხოვნებია:
- შს მინისტრის, გიორგი გახარიას გადადგომა;
- 20 ივნისის აქციაზე დაკავებულ პირთა განთავისუფლება;
- მომავალი არჩევნების პროპორციული წესით ჩატარება.
