საოკუპაციო ძალების მიერ, ე.წ. საზღვრის უკანონო კვეთისთვის, დაკავებული საქართველოს რვა მოქალაქე გაათავისუფლეს. საოკუპაციო რეჟიმმა ისინი გუშინ, 20 გვისტოს გადასცა ქართულ მხარეს.
„რვავე დაკავებული თავისუფალია და ისინი საქართველოს ცენტრალური ხელისუფლების მიერ კონტროლირებად ტერიტორიაზე იმყოფებიან. ამ ეტაპისთვის მოგახსენებთ, რომ ცხინვალის სასამართლოში სავარაუდოდ მათი ახლობლების მიერ გადახდილი იქნა შესაბამისი ჯარიმები“, - ამის შესახებ, ერგნეთთან, ჟურნალისტებს საქართველოს შინაგან საქმეთა სამინისტროს საპატრულო პოლიციის დეპარტამენტის ხელმძღვანელმა, ვაჟა სირაძემ განუცხადა.
გათავისუფლებული პირები შემდგომი საგამოძიებო მოქმედებებისთვის გადაყვანილი იქნენ შიდა ქართლის პოლიციაში.
მოგვიანებით, საქართველოს პრემიერ-მინისტრმა მამუკა ბახტაძე, სოფელ ახალუბანში ცხინვალის იზოლატორიდან გათავისუფლებული რვა ახალგაზრდა მოინახულა. ამის შესახებ ინფორმაციას პრესამსახური ავრცელებს.
„ძალიან მნიშვნელოვანი იყო, რომ მთელი მსოფლიო თანამეგობრობა ჩვენს გვერდით დადგა და მნიშვნელოვანია, რომ ჩვენი ყველა უწყება პირველივე წუთებიდან ჩართული იყო“.
პრემიერთან ერთად სოფელში იმყოფებოდნენ პარლამენტის თავმჯდომარე არჩილ თალაკვაძე, სახელმწიფო მინისტრი შერიგებისა და სამოქალაქო თანასწორობის საკითხებში, ქეთევან ციხელაშვილი და შიდა ქართლის სახელმწიფო რწმუნებული გიორგი ხოჯევანიშვილი.