მამუკა ხაზარაძემ და ბადრი ჯაფარიძემ გირაოდ შეფარდებული 700 000 -700 000 ლარი პროკურატურის მიერ მითითებულ საბანკო ანგარიშზე შეიტანეს. ამის შესახებ ინფორმაცია „ლიბერალს“ ადვოკატმა ზვიად კორძაძემ დაუდასტურა.
შეგახსენებთ, რომ მთავარი პროკურატურა მამუკა ხაზარაძესთვის და ბადრი ჯაფარიძისთვის აღკვეთის ღონისძიების სახით მილიონ-მილიონი ლარის შეფარდებას ითხოვდა, თუმცა თბილისის საქალაქო სასამართლოს გადაწყვეტილებით, თითოეულს 700 000-ლარიანი გირაო და გამოძიების თანხმობის გარეშე საზღვრის კვეთის აკრძალვა შეეფარდა.
„თიბისი ბანკის“ დამფუძნებლებს ბრალი ოფიციალურად 24 ივლისს წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება. მოგვიანებით კი ზემოხსენებულ დანაშაულში დახმარების გამო ბრალდებულად სცნეს "ტვ პირველის" დამფუძნებლის მამა ავთანდილ წერეთელი.
