აფხაზეთის ე.წ. საპრეზიდენტო არჩევნებზე გერმანიიდან ორი დეპუტატის დამკვირვებლად ყოფნის თაობაზე, საქართველოს საგარეო უწყების წარმომადგენელმა ვლადიმერ კონსტანტინიდმა კომენტარი გააკეთა. მისი თქმით, დეპუტატები რუსული გავლენის ქვეშ იმყოფებიან, რასაც ისიც მოწმობს, რომ მათი ვიზიტის დაფინანსება განხორციელდა რუსული მხარის მიერ.
„საგარეო საქმეთა სამინისტრო პრევენციულ რეჟიმში მუშაობდა ყველა პარტნიორ ქვეყანასთან და განსაკუთრებით იმ ქვეყნებთან, რომლებზეც გაიჟღერა გარკვეულმა ინფორმაციამ, მათ შორის აგხაზურ პრესაში. გაცილებით მაღალი შეიძლება ყოფილიყო ციფრი ე.წ. დამკვირვებლებისა, რომ არა ჩვენი პრევენციული ღონისძიებები.
რაც შეეხება ორ დეპუტატს გერმანიიდან, მათ არ ჰქონდათ არანაირი უფლებამოსილება და სტატუსი იმ სტრუქტურებიდან, რომელსაც ისინი წარმოადენენ. ეს იყო მათი პირადი ვიზიტი, გვაქვს ინფორმაცია, რომ ეს ადამიანები არიან ულტრამემარჯვენე პარტიიდან, იმყოფებიან რუსული გავლენის ქვეშ, რასაც ისიც მოწმობს, რომ მათი ვიზიტის დაფინანსება აფხაზეთის რეგიონში განხორციელდა რუსული მხარის მიერ მიუხედავად იმისა, რომ ისინი გაფრთხილებული იყვნენ, რომ ოკუპირებულ რეგიონში ჩასვლით დაარღვევდნენ როგორც საერთაშორისო კანონმდებლობას, ასევე ქართულ კანონმდებლობას",- განაცხადა კონსტანტინიდმა.
კონსტანტინიდის განცხადებით, საგარეო უწყებას შესაძლო შედეგებზე კომუნიკაცია ექნება გერმანულ მხარესთან და ყველა ფაქტორის გათვალისწინებით მოხდება შესაბამისი დასაბუთებული რეაგირება ქართული მხარის მიერ.
