გუშინ, 28 აგვისტოს, ხაშურის მუნიციპალიტეტის სოფელ ჩორჩანას სიახლოვეს, ოკუპირებულ ტერიტორიაზე, საოკუპაციო ძალის სამხედრო ტექნიკის გადაადგილება შეინიშნებოდა.
ცხინვალის რეგიონის დე ფაქტო ხელისუფლების „გაღიზიანება“, საქართველოს მთავრობის მიერ კონტროლირებულ ტერიტორიაზე, სოფელ ჩორჩანის ტყეში გზის გაყვანას და პოლიციის საგუშაგოს განთავსებას მოჰყვა. ოკუპირებული ცხინვალის რეგიონის დე ფაქტო ხელისუფლების წარმომადგენლები, მოითხოვენ, რომ ქართულმა მხარემ ე.წ. სასაზღვრო ტერიტორიიდან გაიყვანოს შეიარაღებული ფორმირებები და უკანონო მშენებლობა შეწყვიტოს.
საქართველოს მთავრობის წარმომადგენლებისთვის კი მიუღებელია პროტესტი, რომელსაც ცხინვალის რეგიონის დე ფაქტო ხელისუფლება გამოთქვამს.
როგორც შერიგებისა და სამოქალაქო თანასწორობის საკითხებში სახელმწიფო მინისტრის აპარატის წარმომადგენელმა ზვიად ზვიადაძემ, ერგნეთში, ინციდენტების პრევენციისა და მათზე რეაგირების მექანიზმის რიგით 95-ე შეხვედრის დაწყების წინ ჟურნალისტებს განუცხადა, „ჩვენს მიერ კონტროლირებულ ტერიტორიაზე საგუშაგოს მოწყობა ჩვენი უფლებაა და პროტესტი მიუღებელია“.
„ჩვენს კონტროლირებად ტერიტორიაზე მიმდინარეობს საგუშაგოს მოწყობა, რაც ჩვენი უფლებაა და ამაზე პროტესტი ჩვენთვის მიუღებელია, რადგანაც ეს არის ჩვენ მიერ კონტროლირებადი ტერიტორია, სადაც სრული უფლება გვაქვს, ვაწარმოოთ ის სამუშაოები, რომელსაც ცენტრალური ხელისუფლება ჩათვლის საჭიროდ".
ერგნეთში ინციდენტების პრევეციისა და მათზე რეაგირების მექანიზმის რიგით 95-ე შეხვედრა მიმდინარეობს. შეხვედრას თანათავმჯდომარეობას უწევენ ევროკავშირის სადამკვირვებლო მისიის ხელმძღვანელი ერიკ ჰოგი და ეუთოს სპეციალური წარმომადგენელი სამხრეთ კავკასიაში, რუდოლფ მიჰალკა. შეხვედრას ესწრებიან ქართული და რუსული მხარის უწყებების წარმომადგენლები, ასევე, ოსური მხარის ე.წ. უწყებების წარმომადგენლები.
