უკრაინის პარლამენტმა, „ვერხოვნა რადამ", დღეს, 10 სექტემბერს, მიიღო კანონპროექტი პრეზიდენტის იმპიჩმენტის შესახებ. შესაბამის გადაწყვეტილებას 245-მა დეპუტატმა დაუჭირა მხარი. 

კანონპროექტის მიხედვით, „რადას“ ეძლევა უფლება, ქვეყნის პრეზიდენტი გადააყენოს მხოლოდ სახელმწიფო ღალატისა და დანაშაულის ჩადენის შემთხვევაში. 

დღემდე არსებული კანონი, რომელიც პროცედურულ საკითხებთან დაკავშირებით მნიშვნელოვან ხარვეზებს შეიცავდა, იმპიჩმენტს პრაქტიკულად შეუძლებელს ხდიდა. მასში მითითებული არ იყო იმპიჩმენტის პროცედურისთვის აუცილებელი საგამოძიებო კომისიისა და მათი წევრების სტატუსი.

კანონპროექტი, „ვერხოვნა რადას", უკრაინის პრეზიდენტმა ვოლოდიმირ ზელენსკიმ 29 აგვისტოს წარუდგინა. ზელენსკის საპრეზიდენტო კამპანიის ერთ-ერთი პირობაც სწორედ სახელმწიფოს მეთაურის იმპიჩმენტის შესაბამისი მექანიზმის რეგულირება იყო.