გენერალურ პროკურატურაში გამოკითხვიდან გამოსული პარლამენტის დამოუკიდებელი დეპუტატის ეკა ბესელიას განცხადებით, მან დაადასტურა ინფორმაცია, რომ პირადი ცხოვრების ამსახველი ფარული ჩანაწერებით ადამიანების შანტაჟი დღემდე მიმდინარეობს, თუმცა დანაშაულის მსხვერპლთა ვინაობა ვერც გამომძიებელთან გაამხილა, ვინაიდან მისთვის ცნობილი ფაქტები სხვათა პირად სივრცეს შეეხება.
დეპუტატის განმარტებით, გვარების დასახელებას მხოლოდ ამ კონკრეტულ პირთა თანხმობის შემთხვევაში შეძლებს. მისი მხრიდან ამ თემაზე საჯარო განცხადების მოტივაცია დანაშაულის პრევენცია და ამ მძიმე პრობლემის მიმართ, რაღაც ფორმით მაინც, რეაგირების მიღწევა იყო. „ვცდილობ საქმე ისე გავაკეთო, რომ არ დავარღვიო ვინმეს პირადი, დაცული სივრცე, რადგან ძალიან კარგად ვიცი, რას ნიშნავს ადამიანების მორალური ტერორი“, - განაცხადა ბესელიამ.
დეპუტატის თქმით, მისთვის ცნობილია ფარული ჩანაწერებით შანტაჟის ოთხი შემთხვევის შესახებ და ყველგან დანაშაულის მსხვერპლს მმართველი გუნდის წევრები წარმოადგენენ. იგი არ გამორიცხავს, რომ რეალურად ამ სპეციფიკური დანაშაულის მეტ შემთხვევასთან გვქონდეს საქმე.
ეკა ბესელიას განცხადებით, პროკურატურის წარმომადგენლებთან აგრეთვე ისაუბრა სხვა შესაძლო დანაშაულზეც, სადაც წინა შემთხვევისგან განსხვავებით, შეუძლია დაასახელოს კონკრეტული დეპუტატების გვარები, რომლებიც ზეგავლენით ვაჭრობენ და ამით სარგებელს იღებენ. „ამ კავშირების ერთ-ერთი დადასტურებაა ბატონ დავით მათიკაშვილის მეუღლის მოსამართლედ დანიშვნა. ვანო ზარდიაშვილი იბრალებს, რომ მისი გავლენით მოხდა ეს დანიშვნა. ფაქტია მოსამართლედ არჩევა, რამდენიმე უარის შემდეგ, სწორედ ამ ადამინების პარლამენტში დეპუტატებად შემოსვლის შემდეგ მოხდა. ისიც ფაქტია, რომ ერთ-ერთის მეუღლე იუსტიციის საბჭოს თანამშრომელია და ხელმძღვანელობს დეპარტამენტს, რომელიც მოსამართლეთა შერჩევის პროცესშია ჩართული. თუ გამოძიება დაიწყება მზად ვარ პროკურატურას მეტი ინფორმაცია მივაწოდო“ - განაცხადა ეკა ბესელიამ.
