თბილისის საქალაქო სასამართლომ ძალაში დატოვა „თიბისი ბანკის“ დამფუძნებლების მამუკა ხაზარაძისა და ბადრი ჯაფარიძის, ასევე, ბიზნესმენ ავთანდილ წერეთლის მიმართ გამოყენებული გირაო. მოსამართლემ არ დააკმაყოფილა ადვოკატ ზვიად კორძაძის შუამდგომლობა, რომელიც მამუკა ხაზარაძისა და ბადრი ჯაფარიძისთვის აღმკვეთ ღონისძიებად შეფარდებული 700-700 ათასი ლარიანი, ხოლო ავთანდილ წერეთლისთვის ნახევარ მილიონი ლარის ოდენობის გირაოს გაუქმებას მოითხოვდა.
მოსამართლემ გადაწყვეტილების მიზეზად განმარტა, რომ კვლავ არსებობს ბრალდებულთა მიმალვის და მოწმეებზე ზემოქმედების საფრთხე.
შეგახსენებთ, რომ პროკურატურა მამუკა ხაზარაძეს და ბადრი ჯაფარიძეს ბრალს სდებს 2008 წელს, ჯგუფურად 16 754 000 ამერიკული დოლარის უკანონო შემოსავლის ლეგალიზაციაში. გამოძიების ვერსიით „თიბისი ბანკის“ ხელმძღვანელების, დანაშაულებრივი სქემის განხორციელებაში ავთანდილ წერეთელი დაეხმარა.
