მოძრაობა „ძალა ერთობაშია"-ს ლიდერ დავით ქაცარავას სოფლების ატოცის და აბანოს მოსახლეობა დაუპირისპირდა. ადგილობრივებმა ქაცარავას ქმედებებს პროვოკაციული უწოდეს და ტერიტორიის დაუყოვნებლივი დატოვება მოსთხოვეს. როგორც ისინი ამბობდნენ, ქაცარავა რუსების გაღიზიანებით არის დაკავებული.
მოსახლეობასა და „ძალა ერთობაშიას“ წევრებს შორის დაპირისპირება სიტყვიერ და ფიზიკურ შეურაცხყოფაში გადაიზარდა.
დავით ქაცარავა და ანტისაოუკუპაციო მოძრაობა ამ ყველაფერს ხელისუფლების მიერ დაგეგმილ და ორგანიზებულ პროვოკაციად აფასებს.
ქაცარავას თქმით, დაახლოებით ორი თვის წინ იგივე სიტუაცია იყო, როდესაც სოფელ ბობნევში რამდენიმე აქტივისტი დახვდა და როგორც შემდგომში გაირკვა ეს ადამიანები „ქართული ოცნების“ აქტივთან დაახლოებული პირები იყვნენ.
„რამდენიმე ადამიანი შეიკრიბა, უმრავლესობა ნასვამ მდგომარეობაში, რომელთაც ძალიან აგრესიულად დაიწყეს ჩვენი დადანაშაულება, რომ თურმე სადაც ჩვენ ვჩნდებით, იქ სიტუაცია იძაბება. ამას ჩვენ ერთმნიშვნელოვნად ხელისუფლების მიერ მოწყობილ პროვოკაციად ვაფასებთ, რომელიც ანტისაოკუპაციო მოძრაობა „ძალა ერთობაშიას“ დისკრედიტაციასა და მარგინალიზებას ემსახურება. ჩვენთვის ძალიან კარგადაა ცნობილი მოსახლეობის უდიდესი ნაწილის პოზიტიური განწყობა ჩვენს მიმართ, თუ ასეთი ტიპის„ტიტუშკების“ გუნდებს არ ჩავთლით, რომელიც ხელისუფლებას ჰყავს“, - განაცხადა დავით ქაცარავამ.
