ცენტრალური სარჩვენო კომისია ლაგოდეხის მუნიციპალიტეტის აფენის, ადიგენის მუნიციპალიტეტის არალისა და მარტვილის მუნიციპალიტეტის კიწიის თემებში საკრებულოს შუალედური არჩევნების შემაჯამებელ შედეგებს აქვეყნებს, რომლის მიხედვით ყველა უბანში „ქართული ოცნების“ კანდიდატებმა გაიმარჯვეს.

ოფიციალური მონაცემების  მიხედვით, ლაგოდეხში 84,4 პროცენტით გაიმარჯვა „ქართული ოცნება - დემოკრატიული საქართველოს“ წარმომადგენელმა ომარ შველიძემ; კონკურენტის გარეშე დარჩენილმა მართველი პარტიის წარმომადგენლებმა ზურაბ ფეიქრიშვილმა - ადიგენში და რობერტ კაკულიამ მარტვილში, მონაწილე ამომრჩეველთა საერთო რაოდენობის 100 პროცენტი მიიღეს.

ცესკოს მიერ გამოქვეყნებული განცხადების მიხედვით, ამ დროისთვის შუალედური არჩევნების ყველა პროცედურა დასრულებულია. არჩევნები შვიდივე საარჩევნო უბანზე მშვიდ გარემოში და კანონმდებლობის სრული დაცვით წარიმართა. სადამკვირვებლო ორგანიზაციებს და საარჩევნო სუბიექტების უფლებამოსილ წარმომადგენლებს შესაძლებლობა ჰქონდათ თავისუფლად დაკვირვებოდნენ მთელი დღის განმავლობაში კენჭისყრის პროცესს და შემდეგ უკვე ხმის დათვლის პროცედურებს.

27 ოქტომბრის არჩევნებს 10 ადგილობრივ სადამკვირვებლო ორგანიზაციასთან ერთად აკვირდებოდნენ „სამართლიანი არჩევნებისა და დემოკრატიის საერთაშორისო საზოგადოების" (ISFED) წარმომადგენლებიც, რომელთა შეფასებით, მიუხედავად იმისა რომ პროცესმა ძირითადად, მშვიდ და ორგანიზებულ ვითარებაში ჩაიარა, მასიური სახე ჰქონდა „ქართული ოცნების“ კოორდინატორებისა და აქტივისტების მობილიზების და მათ მიერ ამომრჩევლის აღრიცხვის მანკიერი ტრადიციის გაგრძელებას.

„რიგ შემთხვევებში, საარჩევნო უბანზე მისული ამომრჩევლის აღრიცხვას კოორდინატორები საკუთარ ავტომობილებში აწარმოებდნენ. ლაგოდეხის 25-ე საარჩევნო უბნის მიმდებარედ განთავსებული იყო მაგიდები, სადაც „ქართული ოცნების“ კოორდინატორები ამომრჩეველს კენჭისყრის შენობაში შესვლამდე, სიების მეშვეობით აღრიცხავდნენ“ - აცხადებენ ორგანიზაციაში.

„სამართლიანი არჩევნებში“ მიიჩნევენ, რომ მსგავსი ქმედებები წარმოადგენს ამომრჩევლის ნების კონტროლს, რაც ნეგატიურ ზეგავლენას ახდენს ამომრჩევლის ნების თავისუფალ გამოვლენაზე და შესაძლოა ამომრჩევლის მიერ აღქმული იქნას, როგორც ირიბი ზეწოლა. ამასთან, ამომრჩევლის აღრიცხვის პრაქტიკა კიდევ ერთხელ წარმოაჩენს წინასაარჩევნო პერიოდში ამომრჩეველზე ზეწოლა-მუქარის გარემოს პრობლემურობას და მის ნეგატიურ გავლენას საარჩევნო პროცესზე.