ქუთაისში, ნიკეას ქუჩაზე მშენებარე კორპუსის მეოთხე სართულიდან მუშა გადმოვარდა. დაშავებული, მძიმე ტავმებით საავადმყოფოში გადაიყვანეს, სადაც უკვე ორი ოპერაცია ჩაუტარდა. ამ დროისთვის პაციენტის მდგომარეობა სტაბილურია.
სამშენებლო კომპანიის შრომის უსაფრთხოების მენეჯერის, ცოტნე ბარბაქაძის განცხადებით სამშენებლო მოედანზე უსაფრთხოების ზომები დაცული იყო და ფაქტი თავად მუშის დაუდევრობამ გამოიწვია. როგორც მან „რუსთავი 2-თან“ განაცხადა, გადმოვარდნის დროს დასაქმებული სამსახურეობრივი დავალებას არ ასრულება და არც უსაფრთხოების ქამარი ეკეთა.
გავრცელებული ინფორმაციით, დაშავებული აზერბაიჯანის მოქალაქე შინაგან საქმეთა სამინისტროს დაკვეთით წარმოებულ მშენებლობაზე ერთი კვირის წინ დასაქმდა. სამშენებლო კომპანია - "თ.მ." ქუთაისში შს სამინისტროს თანამშრომლებისთვის ორ თერთმეტსართულიან კორპუსს აშენებს.
გამოძიება საქართველოს სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.
