საპატრიაქროში სინოდის სხდომაზე დასასწრებად მისულმა მეუფე ანტონმა ჟურნალისტებთან განაცხადა, რომ სხდომაზე მეუფე იაკობის მიერ გაკეთებულ განცხადებებზე ისაუბრებენ. მისი თქმით, ასევე არ არის გამორიცხული, რომ მსჯელობა დეკანოზ მამალაძის საკითხსაც შეეხოს. მეუფე ანტონი ამბობს, რომ შესაძლოა უკრაინის ავტოკეფალიის აღიარებაზეც ისაუბრონ.
„აქ სწორედ იმის გამო ვართ მოსულები, რომ გავარკვიოთ რა თქვა მეუფე იაკობმა. დაველოდები ახსნა-განმარტებებს, კითხვა-პასუხებს, ამის შემდეგ გავერკვევი სიტუაციაში“,-ამბობს მეუფე ანტონი.
ჟურნალისტების კითხვაზე ენდობა თუ არა ის მეუფე იაკობის განცხადებას, მეუფე ანტონის პასუხობს:
„არც იმის საფუძველი მაქვს ვენდო, არც იმის, რომ არ ვენდო. საერთოდ კითხვები განკვეთა და ასე შემდეგ ამოიღეთ, ასეთი რაღაცეები არ არსებობს. გიორგი მამალაძესთან დაკავშირებით ჩემი პოზიცია როგორიც იქნება, ეს პატრიარქთან იქნება შეჯერებული. მე მისი წერილი არ მინახავს, წავიკითხავ და ვიმსჯელებთ“,-ამბობს მეუფე ანტონი.
ჟურნალისტის კითხვაზე, მოხდება თუ არა სხდომაზე უკრაინის ეკლესიის ავტოკეფალიის აღიარების საკითხზე მსჯელობა და რა პოზიცია ექნება მას, მეუფე პასუხობს:
„გაუმარჯოს უკრაინას და უკრაინელებს, ვიმსჯელებთ უკრაინის ავტოკეფალიის შესახებაც“,-განაცხადა მეუფე ანტონმა.
საპატრიარქოში სინოდის სხდომა 12:00 საათზე დაიწყება. რამდენიმე მღვდელმთავარი უკვე საპატრიარქოშია, ადგილზე დაცვა და უსაფრთხოების ზომები გამკაცრებულია.
