ტელეკომპანია “მთავარი არხის“გენერალური დირექტორი, ნიკა გვარამია ახალი ბრალის გასაცნობად დღეს, 19:00 საათზე, საქართველოს გენერალურ პროკურატურაში დაიბარეს.

როგორც „ლიბერალს“ პროკურატურიდან აცნობეს, ბრალდების კვალიფიკაცია კვლავ შეეხება მისი „რუსთავი 2-ის“ გენერალური დირექტორობის პერიოდში, ტელეკომპანიის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისებისა და ქონების მოჩვენებითი გარიგებით გადამალვის ფაქტებს.

კონკრეტულად ის, თუ რა შინაარსის ახალ ეპიზოდზე ედავება გამოძიება გვარამიას, მას შემდეგ გასაჯაროვდება, რაც ბრალდების დადგენილებას ოფიციალურად ჩააბარებენ.

შეგახსენებთ, რომ საქართველოს გენერალურმა პროკურატურამ გამოძიება ,,რუსთავი 2-ის" ინტერესის საწინააღმდეგოდ ფინანსური დანაშაულის ფაქტზე 2019 წლის 20 ივლისს დაიწყო. ამ გამოძიების ფარგლებში ნიკა  გვარამიასთან ერთად ბრალი წარედგინა "რუსთავი 2-ის" ყოფილ ფინანსური დირექტორის - კახაბერ დამენიას და „ინტერ მედია პლიუსის“ დირექტორს - ზურაბ იაშვილს.