მღვდელ, მამა გიორგი სხილაძის განცხადებასთან დაკავშირებით, სადაც იგი მის მიმართ განხორციელებულ მუქარაზე საუბრობდა, შინაგან საქმეთა სამინისტროში გამოძიება დაიწყო. სასულიერო პირმა საქართველოდან სასწრაფოდ გამგზავრება სწორედ ამ რეალური საფრთხით ახსნა.

შსს-ს ინფორმაციით, საქმეზე გამოძიება სისხლის სამართლის კოდექსის 151-ე მუხლის პირველი ნაწილით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.

„მე არ ვაპირებდი წასვლას და კვირას კიდევ წირვა მქონდა დანიშნული თბილისში, მაგრამ გუშინ დაგვიკავშირდნენ ახლობლები და შეგვატყობინეს, რომ არის რეალური საფრთხე და სასწრაფოდ დავტოვეთ თბილისი. ეს არის საპატრიარქოს მიერ ორგანიზებული, ასე ვთქვათ, ფანატიკური ჯგუფები მომისიონ და სულ მცირე, გამანადგურონ. მეუღლე მახლდა გვერდით და მისი უსაფრთხოების გამო, დავტოვე თბილისი", - ამბობს სასულიერო პირი.

შეგახსენებთ, რომ მამა გიორგი სხილაძე საქართველოდან საზღვარგარეთ რამდენიმე დღის წინ გაემგზავრა. სასულიერო პირის თქმით, მას სიცოცხლის მოსპობით ემუქრებოდნენ. მანამდე მამა გიორგი სხილაძემ წილკნისა და დუშეთის მთავარეპისკოპოსი, მეუფე ზოსიმე შიოშვილი სექსუალური ძალადობის მცდელობაში დაადანაშაულა.