გავრცელებული ინფორმაციით, პარლამენტთან მიმდინარე აქციის დროს პოლიციამ სამი პირი დააკავა. სამართალდამცავებთან დაპირისპირება მას შემდეგ გამძაფრდა, რაც უმაღლესი საკანონმდებლო ორგანოს უკანა შესასვლელთან განთავსებულ რკინის კონსტრუქციებზე დემონსტრანტები წარწერების გაკეთებას შეეცადნენ.
საპატრულო პოლიციის დეპარტამენტის უფროსის ვაჟა სირაძის განცხადებით, პირები, რომლებიც აპირებდნენ პარლამენტის შესასვლელის ბლოკირებას, პოლიციამ ადგილს განარიდა.
ადგილზე შეკრებილი სამოქალაქო აქტივისტები და ოპოზიციური პარტიების ლიდერები, პოლიციის მიმართ სკანდირებდნენ: „მონებო!“ დემონსტრანტებმა ბიძინა ივანიშვილის გამოსახულებიანი ამერიკული დოლარის კუპიურებიც გამოფინეს.
დღეს დილიდან პოლიციამ რკინის კონსტრუქციებით გადაკეტა პარლამენტის მიმდებარე ჩიტაძის და ზუბალაშვილების ქუჩები, ასევე ინგოროყვას ქუჩის ნაწილიც.
საპროტესტო აქციების ახალი ტალღა მას შემდეგ დაიწყო, რაც 14 ნოემბერს პარლამენტმა არ დაუჭირა მხარი საკონსტიტუციო ცვლილების პროექტს, რომელიც 2020 წლის არჩევნების პროპორციული სისტემით ჩატარებას ითვალისწინებდა.
