შინაგან საქმეთა მინისტრის, ვახტანგ გომელაურის განცხადებით, პარლამენტის მიმდებარე ტერიტორია იმიტომ გადაკეტეს, რომ ისევ არ მოხდეს ცეცხლის დანთება, ისევ არ მოხდეს პიკეტირებები და აქციის მონაწილეებმა დისკომფორტი არ შეუქმნან ხალხს.
„შეშას არ შემოვატანინებთ, არც კასრებს შემოვატანინებთ, 90-იან წლებში ნუ დაგვაბრუნებენ და ნუ დააბრუნებენ ხალხს, არ არის ეს კარგი, ცუდია. ჩვენ ვუთხარით გენერატორებზე, შმეოიტანეთ, მოგეხმარებით, დენის გამათბობლებზეც ვუთხარით, მაგრამ არა შეშები და ბოჭკები. მათ უნდათ ჭიდაობა”, - განაცხადა გომელაურმა.
მინისტრის თქმით, არსებული სიტუაცია ყველას დისკომფორტს უქმნის: „დისკომფორტი როგორ არ არის, ოთხი დღე რომ გარეთ ვდგავართ დილიდან. პირველ რიგში პოლიციელები არიან ცოდოები. ყველა ვართ ცოდო, ყველა მოქალაქე, რომელიც აქ ცხოვრობს, რომელიც წუხდება და ის მოქალაქეებიც, რომლებიც გარეთ დგანან".
გომელაური მიიჩნევს, რომ პროცესებმა ქუჩიდან პარლამენტში უნდა გადაინაცვლოს.
„უნდა მიხვდეს ოპოზიცია, რომ უნდა დაამთავროს თემა და შევიდნენ კაბინეტებში, მოხდეს შეთანხმება ამა თუ იმ კანონის, რა ჯდება კონსტიტუციაში, გერმანული მოდელი იქნება ეს, იაპონური თუ ფრანგული, კაბინეტში უნდა დასხდნენ და არა ქუჩაში“.
