ოპოზიციის და სამოქალაქო აქტივისტები  პარლამენტის პიკეტირებისთვის ადგილზე 10:00 საათისთვის შეიკრიბნენ. მათ საკანონმდებლო ორგანოს შესასვლელთან რკინის ჯებირები აღარ დახვდათ. როგორც დემონსტრანტებმა გაარკვიეს, „ქართული ოცნების“ წევრები უკვე პარლამენტში იმყოფებოდნენ. უმრავლესობის სხდომა 9:00 საათზე ყოფილა ჩანიშნული.

„ნაციონალური მოძრაობის“  წევრის ზაალ უდუმაშვილის  განცხადებით, „ქართული ოცნების“ დეპუტატები დილის  ხუთ საათზე გააღვიძეს და როგორც ცხვრები ისე შერეკეს პარლამენტში. „თუ ასე სურთ მუშაობა, კი ბატონო, იმუშაონ ასე. ხან ნაკრძალად გამოაცხადონ სამთავრობო სექტორი, ხან დილის ხუთ საათზე გააღვიძონ დეპუტატები. არაუშავს, ჩვენ არ დავიღლებით. შემდგომი სესიაზე, ისევ ღამეს გავათენებთ და ისევ დავდგებით აქ და როგორ შევლენ, ვნახოთ. ის ხვრელებიც ვიცით, საიდანაც გუშინ შედიოდნენ დეპუტატები. იმ ხვრელებსაც ამოვქოლავთ“, - განაცხადა უდუმაშვილმა.

„ევროპული საქართველოს“ წევრმა, გიგა ბოკერიამ, უმრავლესობის დეპუტატებისთვის შექმნილი დისკომფორტის ერთ-ერთ გამოვლინებად დაასახელა მათი დილით ადრე მისვლა პარლამენტში. „თქვენ ვერ წარმოიდგენთ დილის ექვს საათზე გაღვიძება როგორი დისკომფორტია მაგალითად ბატონი ბოლქვაძისთვის. არა, ბოლქვაძე შეიძლება არასწორი მაგალითია. მეზურნიშვილისთვის. პირობითად ვიძახი, ერთი სახეა ჩემთვის ყველა ეგ კლოუნი. ვოლსკისთვისაც. არ უყვარს მაგას ადრე გაღვიძება“, - უთხრა მან ჟურნალისტებს.