როდესაც გაერო-ს გენერალური ასამბლეის 63-ე სესიამ ხმათა უმრავლესობით მიიღო რეზოლუცია "აფხაზეთიდან (საქართველო) და ცხინვალის რეგიონიდან (საქართველო) ადგილნაცვალი პირებისა და ლტოლვილების მდგომარეობის შესახებ", ვენესუელამ აფხაზეთისა და ე.წ. სამხრეთ ოსეთის დამოუკიდებლობა აღიარა. ეს განცხადება ვენესუელის პრეზიდენტმა უგო ჩავესმა მოსკოვში ვიზიტის დროს გააკეთა.
რუსეთის მცდელობამ გაერო-ში რეზოლუციის მიღება ვერ ჩაშალა და მას მხარი 48 ქვეყანამ დაუჭირა, 19 წინააღმდეგი იყო, 78-მა კი თავი შეიკავა. მოწინააღმდეგეთა შორის რუსეთსა და ვენესუელასთან ერთად მეზობელი სომხეთიც აღმოჩნდა.
მიღებული რეზოლუცია აღიარებს იძულებით გადაადგილებულ პირთა და დევნილთა, ასევე მათი შთამომავლების დაბრუნების უფლებას თავიანთ სახლებში. რეზოლუცია ასევე ხაზს უსვამს ამ რეგიონებში "ჰუმანიტარული საქმიანობის განხორციელებისთვის შეუფერხებელი შესვლის უკიდურეს საჭიროებას".
ამჟამად საქართველოში 293 048-ზე მეტი დევნილი ცხოვრობს, მათგან 245 363 აფხაზეთიდანაა.