"ბუნებრივია, საქმის კურსში ვართ, გვაქვს კომუნიკაცია აზერბაიჯანელ კოლეგებთან და ვაპირებთ ელჩთან გასაუბრებასაც. კონკრეტულად დავით გარეჯის კომპლექსის, უდაბნოს მონასტერს რაც შეეხება, იგი საბჭოთა კავშირის დროიდან საქართველოს ტერიტორიად არ ითვლება და აზერბაიჯანის კუთვნილებას წარმოადგენს," - ეს განცხადება საგარეო საქმეთა მინისტრის მოადგილე ნინო კალანდაძემ ორშაბათის ტრადიციულ ბრიფინგზე გააკეთა.
დავით გარეჯის სამონასტრო კომპლექსის ის ნაწილი, რომელიც აზერბაიჯანელმა მესაზღვრეებმა 6 მაისს დაიკავეს აზერბაიჯანის ტერიტორიაზეა. ინფორმაცია აზერბაიჯანელი მესაზღვრეების მიერ ლავრის უდაბნოს მონასტრის დაკავებაზე რამდენიმე დღის წინ ტელეკომპანია "მაესტროს" საშუალებით გავრცელდა.
მღვდელმონაზონი კირიონის თქმით, 6 მაისის შემდეგ უდაბნოს მონასტერისკენ შეზღუდულია ადამიანთა გადადგილება.
"პრეტენზია მუდმივად გააჩნდათ ამ ტერიტორიებზე და უკვე 6 მაისიდან არც ქართველ და არც უცხოელ ტურისტებს არ უშვებენ. დაშვებულია, ჩვენი, როგორც სასულიერო პირების ასვლა," - ამბობს მღვდელმონაზონი კირიონი.
საბჭოთა კავშირის დაშლის შემდეგ დავით გარეჯის სამონასტრო კომპლექსის ნაწილი აზერბაიჯანის საზღვრებში მოექცა. ეს ეხება ლავრის უდაბნოს მონასტერსაც, თუმცა აზერბაიჯანელი მესაზღვრეები მხოლოდ ახლა ჩადგნენ სასაზღვრო ადგილას.
საქართველოსა და აზერბაიჯანის ზუსტი საზღვრების პრობლემა ჯერ კიდევ დგას. ნინო კალანდაძის თქმით, საზღვრების დელიმიტაციისათვის სამუშაო ჯგუფები არსებობენ.
"დელიმიტაციის საკითხებზე რამდენიმე სამუშაო ჯგუფია შექმნილი. აქტიური მუშაობა მიმდინარეობს, თუმცა პროცესი ჯერ დასრულებული არ არის. ეს პროცესი სირთულეებთან არის დაკავშირებული და შეთანხმებას გარკვეული პერიოდი სჭირდება", - ამბობს კალანდაძე.