გამოცდების ეროვნული ცენტრის ეზოში ჟურნალისტებს არ უშვებენ - ამის შესახებ ეროვნული ცენტრიდან “ლიბერალის” კორესპონდენტი იტყობინება.
დაცვის წევრებს მიღებული აქვთ ბრძანება, რომ შენობაში არცერთი ჟურნალისტი არ შეუშვან. ჟურნალისტები ამ წუთებში ეზოს კართან იცდიან.
დღეს გამოცდების ეროვნული ცენტრის თანამშრომლები საგანგებო განცხადების გავრცელებას აპირებენ. იმის გამო რომ ჟურნალისტები შენობაში შესვლას ვერ ახერხებენ, ცენტრის თანამშრომლები განცხადებას 12 საათზე, ეზოს გარეთ გააკეთებენ.
გუშინ ეროვნული გამოცდების ცენტრის დირექტორი მაია მიმინოშვილი განათლების მინისტრმა დიმიტრი შაშკინმა მოულოდნელად გაათავისუფლა. ოფიციალური ვერსიით, გათავისუფლების მიზეზად მიმინოშვილის პირადი პოზიციის სამინისტროს პოლიტიკასთან შეუთავსებლობა გახდა.
გუშინვე, დღის მეორე ნახევარში, ცენტრის თანამშრომლებმა პრეზიდენტს მიმართეს, იმავდროულად ცენტრიდან თანამშრომლების წასვლის შესახებ ინფორმაცია გავრცელდა.
ცენტრს გამოცდების პერიოდში, სექტემბრამდე კოკა სეფერთელაძე უხელმძღვანელებს. შეგახსენებთ, რომ კოკა სეფერთელაძე მინისტრის პირველი მოადგილე და განათლების ხარისხის განვითარების ეროვნული ცენტრის დირექტორია.
