“საერთაშორისო გამჭვირვალობა-საქართველო” სამთავრობო პროგრამის შესახებ განცხადებას ავრცელებს.
პროგრამა “მეტი სარგებელი ხალხს” საქართველოს მთავრობამ 2012 წლის ივლისში წარმოადგინა.
“საერთაშორისო გამჭირვალობა საქართველოს” შეფასებით, მთავრობის პროგრამის პოპულარიზაციით მმართველი პარტიის აგიტაცია ხდება, რადგან სამთავრობო პროგრამასა და მმართველი პარტიის მიერ რეგისტრირებულ საარჩევნო ბლოკს ერთი და იგივე სახელი აქვთ. ამიტომ ამომრჩევლისთვის მთავრობისა და პარტიის ერთმანეთისაგან მკაფიო გამიჯვნა თითქმის შეუძლებელი გახდა.
“ამის გამო, საქართველოს მთავრობის მიერ აღნიშნული პროგრამის ფარგლებში რეკლამების და აქციების მოწყობა შესაძლოა შეფასდეს, როგორც პარტია „ერთიანი ნაციონალური მოძრაობის” მიერ მთავრობისგან უსასყიდლოდ მიღებული არამატერიალური ფასეულობა”.- ვკითხულობთ წერილში.
“პოლიტიკური გაერთიანებების შესახებ” საქართველოს ორგანული კანონის თანახმად, სახელმწიფოს მხრიდან პარტიის სასარგებლოდ შემოწირულების განხორციელება აკრძალულია. ამასთანავე, ეუთოს კოპენჰაგენის დოკუმენტი მოითხოვს, რომ არსებობდეს მკაფიო გამიჯვნა პოლიტიკურ პარტიასა და მთავრობას შორის.
“აქედან გამომდინარე, საქართველოს მთავრობასა და „ერთიან ნაციონალურ მოძრაობას “მოვუწოდებთ, რომ კანონის სულისკვეთებიდან და კოპენჰაგენის დოკუმენტიდან გამომდინარე ყოველი ღონე იხმარონ, რათა ამომრჩეველმა მთავრობის მოქმედებებსა და პარტიის მიერ ჩატარებულ საარჩევნო კამპანიას შორის მკაფიო გამიჯვნა შეძლოს”- აღნიშნავს “საერთაშორისო გამჭვირვალობა- საქართველო”.
