კომუნიკაციების ეროვნულმა კომისიამ დღეს ტელეკომპანია “საქართველოს”  კუთვნილი კერძო მაუწყებლობის ლიცენზიები “სამოქალაქო განათლების ფონდს” გადასცა. ფონდის დირექტორი და ერთ-ერთი დამაარსებელი ჟურნალ “ტაბულას” რედაქტორი თამარ ჩერგოლეიშვილია. ჟურნალს სწორედ ეს ფონდი გამოსცემს. ფონდი 2012 წლის ოქტომბრიდან ფუნქციონირებს და მისი გამგეობის წევრები არიან: თა­მარ ჩერ­გო­ლე­იშ­ვი­ლი, გია ნო­დია, გი­გა ზე­და­ნია, ბა­ა­დურ მა­ლა­ზო­ნია, ლე­ვან რა­მიშ­ვი­ლი, ალექ­სი მა­ჭა­ვა­რი­ა­ნი, ბე­ქა მინ­დი­აშ­ვი­ლი, და­ვით პა­ი­ჭა­ძე, კა­ხა ბენ­დუ­ქი­ძე, გი­ორ­გი ფრუ­ი­ძე, ნი­ნო გო­გი­ბე­რი­ძე, და­ვით კოვ­ზი­რი­ძე, ირაკ­ლი სა­ღი­ნა­ძე, ქე­თე­ვან დევ­და­რი­ა­ნი, გი­ორ­გი ლი­ფო­ნა­ვა.  

ტელეკომპანია “საქართველომ” და “სამოქალაქო განათლების ფონდმა” კომუნიკაციების მარეგულირებელ კომისიას ერთობლივი განცხადებით  მიმართეს.

დღეს გამართულ სხდომაზე ლიცენზიის გადაცემის წინააღმდეგ კომისიის მხოლოდ ერთი წევრი წავიდა. აკაკი სიხარულიძის განმარტებით, ტელეკომპანია “საქართველო” მანამდეც არღვევდა კანონს, რადგან საერთო მაუწყებლობის ლიცენზიას მიუხედავად, მის ეთერში არ გადიოდა საინფორმაციო გამოშვებები თუ საზოგადოებრივ-პოლიტიკური ტოქშოუები. “მას 10 წლით  მაინც გაუგრძელეს მაუწყებლობის უფლება. ამიტომ არ ვუჭერ მხარს მისთვის ლიცენზიის გადაცემას,” - განაცხადა სიხარულიძემ.

ტელეკომპანია „საქართველო“  №B21, №B91 და №B99  კერძო საერთო სამაუწყებლო ლიცენზიებს ფლობდა და მისი სიხშირე თბილისსა და დასავლეთ საქართველოს რამდენიმე ქალაქში ვრცელდებოდა.

სამხედრო თემატიკაზე მომუშავე  არხი ეთერში 2007 წლის სექტემბერში გავიდა. საჯარო რეესტრის 2010 წლის მონაცემებით, ამ მაუწყებლის ერთპიროვნული მესაკუთრე ვირჯინიის კუნძულებზე რეგისტრირებული შპს „დენალ იუნიონი“ იყო. 2011 წლის ბოლოდან მისი მფლობელი  მცხეთა - მთიანეთში სახელმწიფო რწმუნებულის ცეზარ ჩოჩელის ძმა, კომპანია „ბარამბოს“ მფლობელი იაგო ჩოჩელია.

"სამოქალაქო განათლების ფონდის" გამგეობის ერთ-ერთი წევრი გიორგი ფრუიძე თავდაცვის ყოფილი მინისტრის დავით კეზერაშვილის კუთვნილი კომპანიების “მედია ჯორჯიასა” და “ჯორჯიან მედია კომპანის” დირექტორიც. ეს უკანასკნელი რამდენიმე დღის განმავლობაში ფლობდა ტელეკომპანიების “რუსთავი 2-ისა” და “მზის” 40 %-იან წილებს.

ჟურნალი “ტაბულა” 2010 წლის 15 მარტიდან ფუნქციონირებს. “სულ მა­ლე ტა­ბუ­ლა სა­ზო­გა­დო­ე­ბას ტე­ლე­ვი­ზი­ის მეშ­ვე­ო­ბი­თაც მი­აწ­ვდის აქ­ტუ­ა­ლურ ინ­ფორ­მა­ცი­ა­სა და ანა­ლიზს. "ტა­ბუ­ლას" ძი­რი­თა­დი მი­სია იყო და დღემ­დე რჩე­ბა, პო­ლი­ტი­კუ­რი პლუ­რა­ლიზ­მის და თა­ვი­სუ­ფა­ლი ბაზ­რის გან­ვი­თა­რე­ბის ხელ­შეწ­ყო­ბა, ადა­მი­ა­ნის უფ­ლე­ბე­ბი­სა და კა­ნო­ნის უზე­ნა­ე­სო­ბის დაც­ვა. ის გა­მოც­დი­ლე­ბა, რაც უკა­ნას­კნე­ლი წლე­ბის გან­მავ­ლო­ბა­ში დაგ­ვიგ­როვ­და, ტე­ლე­ვი­ზი­ის მეშ­ვე­ო­ბი­თაც გაგ­რძელ­დე­ბა,” - ვკითხულობთ დღეს ჟურნალის ვებგვერდზე გამოქვეყნებულ სარედაქციო წერილში.