თბილისის განვითარების ფონდის თანამშრომლებს მერიიდან დაუკავშირდნენ და უთხრეს, რომ მათ ნაწილს სამსახურში დროებით დატოვებენ.
“გვითხრეს, რომ ნაწილს ერთი თვით, ნაწილს კი 3 თვით ტოვებენ, ახლანდელი თანამშრომლების ნახევარს კი ათავისუფლებენ. არც კი ვიცით, რა ნიშნით შეარჩიეს ვინ დარჩებოდა და ვინ - არა, ამაზე კატეგორიული უარი ვუთხარით. არც კი გვინახავს სია, ვის ტოვებენ და ვის-არა. მიგვაჩნია, რომ თანამშრომლების ასე დაყოფა პრინციპულად არასწორია,” - განაცხადა ფონდის თანამშრომელმა ნანა კორძახიამ.
თანამშრომლები ამბობენ, რომ მათთვის შედარებით მისაღები ვარიანტი წლის ბოლომდე ყველა თანამშრომლის სამსახურში დატოვება იქნებოდა.
“ამ პერიოდის განმავლობაში სამუშაოების ნაწილი უკვე დასრულდება, ან ის მაინც გამოჩნდება რა სამუშაოა დარჩენილი და ფუნქციების მიხედვით, ვისი დატოვებაა საჭირო და ვისი გათავისუფლდება. როგორც ჩანს არა ფონდის გაუქმებას, არამედ თანამშრომლების შემცირებას აპირებენ. ყოველ შემთხვევაში ჩვენ იმის შესაძლებლობა მაინც გვექნება, რომ სხვა სამსახური მოვძებნოთ,” - ამბობს კორძახია.
