რუსეთი მზად არის, ქართული ღვინის რუსეთის ბაზარზე დაბრუნების საკითხი განიხილოს. “რია ნოვოსტის” ცნობით, ამის შესახებ განცხადება რუსეთის საგარეო საქმეთა მინისტრის მოადგილე ანდრეი დენისოვმა განაცხადა: “თუ ჩვენ ვსაუბრობთ კონკრეტულ შემთხვევაზე, საქმე ეხება ქართული ღვინის დაბრუნებას რუსეთის ბაზარზე. საკითხის პრაქტიკულად შესწავლის სურვილი ორივე მხარეს არსებობს,”- განაცხადა მან.
“რია ნოვოსტს” საქართველოს პრემიერ-მინისტრის, ბიძინა ივანიშვილის სიტყვები მოჰყავს, რომ საქართველო შეეცდება, უკვე მიმდინარე წელს რუსეთის ბაზარზე წლევანდელი ციტრუსის მოსავალი შეიტანოს.
რუსული გამოცემების თანახმად, საქართველოს სოფლის მეურნეობის ახალი მინისტრი დავით კირვალიძე აცხადებს, რომ ქართული მხარე მზად არის, მიიღოს რუსი ექსპერტები საექსპორტო პროდუქტის ხარისხის შესასწავლად.
რუსეთის ტერიტორიაზე ქართული ღვინის შეტანა 2006 წელს აიკრძალა. ამას საფუძვლად დაედო “როსპოტრებნადზორის” დასკვნა, რომლის თანახმადაც, ქართული მხრიდან დარღვეული იყო სანიტარულ-ეპიდემიოლოგიური ნორმები.
რუსულმა მხარემ ღვინოსთან ერთად ქართული მინერალური წყლების “ ბორჯომისა” და ნაბეღლავის”, ასევე სოფლის მეურნეობის მთელი რიგი პროდუქციის რეალიზაციაც აკრაძალა.
