საქართველოს კულტურისა და ძეგლთა დაცვის მინისტრი გურამ ოდიშარია აფხაზეთის ტერიტორიაზე ილორის, ბედიისა და მოქვის ტაძრების რეაბილიტაციაში ჩართვის ინიციატივით გამოდის. ძეგლების რეაბილიტაციის სურვილი აფხაზეთის დე-ფაქტო პრეზიდენტმა ალექსანდრ ანქვაბიმ გამოხატა, რის შემდეგადაც რეაბილიტაციის პროცესში ქართულმა მხარემ მონაწილეობის მიღება გადაწყვიტა. კულტურის სამინისტრომ რეაბილიტაციაში მონაწილეობა შესაძლოა იუნესკოს დახმარებით მოახერხოს.
"ანქვაბიმ მეცნიერებს და პროფესიონალებს სარეაბილიტაციო პროექტის შემუშავებისკენ ახლახან მოუწოდა, ასე რომ ეს იდეა ჯერჯერობით იქაც ჩანასახის მდგომარეობაშია. პროექტების შემუშავებას ნახევარი წელი მაინც სჭირდება. რესტავრაცია, სავარაუდოდ, შემოდგომიდან დაიწყება. ვესაუბრე აფხაზ მეგობრებს, რომ სასურველია ჩვენი სპეციალისტიც ჩაერთოს რესტავრაციაში. ჯერჯერობით დრო გვაქვს და არ ვაწუხებთ იუნესკოს. თუ უარს გვეტყვიან, შემდეგ მივმართავთ იუნესკოს."- ამბობს ოდიშარია.
როგორც მინისტრი ამბობს, ბედიისა და მოქვის ტაძრები მძიმე მდგომარეობაშია, ხოლო ილორის ტაძარი არასათანადოდაა რესტავრირებული.
"ილორის რესტავრაცია ორი წლის წინ ჩატარდა და რომ ვნახე, ისეთი შელესილი იყო, სუპერმარკეტსა და რესტორანს ჰგავდა." - ამბობს გურამ ოდიშარია.
აფხაზეთის ტერიტორიაზე ძეგლების რესტავრაციაში ჩართვის სურვილი იუნესკოს დახმარებით ქართულ მხარეს ადრეც ჰქონდა, თუმცა მაშინ ვერ გადაწყდა იუნესკოს ექსპერტები რომელი მხრიდან შევიდოდნენ ოჩამჩირის რაიონში.
