თბილისში უფასო სავალდებულო ვაქცინაცია ჩაუტარდება ყველა იმ პირს, რომლებსაც კონტაქტი ჰქონდათ წითელათი დაავადებულებთან , - ამის შესახებ "ინტერპრესნიუსს" დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ განუცხადა.
მისი თქმით, ვაქცინაცია მარტში დაიწყება და სამი თვის განმავლობაში გაგრძელდება. გამყრელიძის ცნობით, ვაქცინაცია ჩაუტარდებათ 6 თვიდან 30 წლამდე ასაკის ყველა იმ პირს, რომელსაც წითელათი დაავადებულთან ჰქონდა კონტაქტი. 30 წლის ზემოთ ვაქცინაცია ნებაყოფლობითი იქნება. გამყრელიძის განმარტებით, ასევე, უფასო ვაქცინაცია ჩაუტარდებათ 1-იდან 7 წლამდე იმ ბავშვებს, რომელთაც წითელას აცრა ჩატარებული არ აქვთ. 
გამყრელიძემ აღნიშნა, რომ წითელას ვაქცინაცია წითურასა და ყბაყურასთან ერთად სავალდებულო აცრების ეროვნულ კალენდარშია. 
მისი ცნობით, ბოლო კვირეების განმავლობაში თბილისში წითელას ინფექციის შემთხვევების მატება შეინიშნება. გამყრელიძის ინფორმაციით, სულ ქვეყანაში დაფიქსირებულია წითელას დაავადების 67 შემთხვევა, მათგან 60 - თბილისში. გასულ წელს სულ ქვეყანაში წითელას 31 შემთხვევა იყო აღრიცხული. ზოგადად, ბოლო წლებში წითელას შემთხვევების რაოდენობა 40-60 ერთეულს არ აღემატებოდა.