ნაფიც მსაჯულებთან დაკავშირებით მთავრობის მიერ მომზადებულ საკანონმდებლო ინიციატივას და პარლამენტის მიერ მის დამტკიცებას იურიდიულ საკითხთა კომიტეტი მხარს არ უჭერს.
როგორც კომიტეტის დასკვნაშია ნათქვამი, ნაფიც მსაჯულთა მიერ საქმის განხილვა ბრალდებულის უფლებაა და პროკურორის სავალდებულო თანხმობით მას ეს უფლება არ უნდა შეეზღუდოს, რადგან ეს ინსტიტუტის არსს ეწინააღმდეგება. იურიდიული კომიტეტი სწორედ ამ მოტივით არ უჭერს მხარს ამ კანონპროექტს.
აღნიშნული საკითხის განხილვა თავის დროზე კამათის ფონზე მიმდინარეობდა. იურიდიულ საკითხთა კომიტეტის თავმჯდომარის, ვახტანგ ხმალაძის განცხადებით, კომიტეტი საკუთარ გადაწყვეტილებაში ერთსულოვანი არ იყო და არიან ისეთი დეპუტატებიც, რომლებიც კანონპროექტს მხარს უჭერენ.
საუბარია "სისხლის სამართლის საპროცესო კოდექსში" შესატანი ცვლილებების პროექტზე, რომელიც პარლამენტმა გუშინდელ სხდომაზე, ხანგრძლივი კამათის შემდეგ პირველი მოსმენით მიიღო. მთავრობა ნაფიც მსაჯულთა სასამართლოსთან დაკავშირებულ 226-ე მუხლის I ნაწილის იმგვარად კორექტირებას ითხოვს, რომლის მიხედვითაც, თუკი წარდგენილი ბრალდება სასჯელის სახით თავისუფლების აღკვეთას ითვალისწინებს, საქმეს ნაფიც მსაჯულთა სასამართლო განიხილავს, გარდა იმ შემთხვევისა, როდესაც მხარეები თანხმდებიან, რომ საქმის განხილვა ნაფიც მსაჯულთა მონაწილეობის გარეშე მოხდეს.
კანონპროექტ წინააღმდეგობას ნაცმოძრაობის წევრები უწევენ. უმცირესობის განცხადებით, აღნიშნული კანონპროექტით ბრალდებულს არჩევანის საშუალება ეზღუდება და იგი პროკურორს ეძლევა.
