დღეს, 17 სექტემბერს, საზოგადოებრივი მაუწყებლის ყოფილმა გენერალურმა დირექტორმა თბილისის სამოქალაქო სასამართლოში სარჩელი შეიტანა.
გიორგი ბარათაშვილი დაკავებული თანამდებობიდან მისი გათავისუფლების შესახებ მიღებულ გადაწყვეტილებას ასაჩივრებს.
აღნიშნული გადაწყვეტილება სამეურვეო საბჭომ 6 სექტემბერს მიიღო.
სასამართლოში ბარათაშვილის ინტერესებს “საქართველოს ახალგაზრდა იურისტთა ასოციაციის” (საია) “მედიის სამართლებრივი დაცვის ცენტრის” იურისტი მარიამ ქოქოსაშვილი იცავს.
“საზოგადოებრივი მაუწყებლის სამეურვეო საბჭომ მაუწყებლის გენერალური დირექტორი გიორგი ბარათაშვილი თანამდებობიდან 2013 წლის 4 მარტს გაათავისუფლა პირველად. 6 თვე ჯერ გასული არ არის, შესაბამისად მიგვაჩნია, რომ 6 სექტემბრის გადაწყვეტილება არაკანონიერია. ამასთან ჩვენ გვაქვს არგუმენტები იმასთან დაკავშირებით, რომ ოქმში არ იყო მითითებული თუ რა მიზეზით მოხდა გიორგი ბარათაშვილისთვის უნდობლობის გამოცხადება.” - ამბობს მარიამ ქოქსაშვილი. მისივე თქმით, საიამ სასამართლოში მაუწყებლის გენერალური დირექტორის თანამდებობაზე გამოცხადებული კონკურსის შეჩერების თაობაზე შუამდგომლობა შეიტანა.
პირველად სამეურვეო საბჭომ გიორგი ბარათაშვილს უნდობლობა 2013 წლის 4 მარტს გამოუცხადა, ხოლო 2013 წლის 29 აპრილს უნდობლობის გამოცხადების შესახებ გადაწყვეტილება სასამართლომ ბათილად ცნო.
