საქართველოს განათლებისა და მეცნიერების სამინისტრომ უსინათლო მოსწავლეებისთვის სპეციალური სასკოლო სახელმძღვანელოების სრული კომპლექტი დაბეჭდა. სახელმძღვანელოები ბრაილის შრიფტით არის შესრულებული.
ასევე წელს, სამინისტროს ინფორმაციით, საქართველოს მასშტაბით არსებულ სპეციალური საგანმანათლებლო საჭიროების მქონე მოსწავლეთა 8 სკოლა-პანსიონის მასწავლებლებს ხელფასი გაეზარდათ. გარდა ამისა, ყველა საჯარო სკოლაში, რომლებშიც სპეციალური საგანმანათლებლო საჭიროების მქონე მოსწავლეები სწავლობენ, დამატებითი პერსონალი-მასწავლებელი დაინიშნა.
უსინათლო და სუსტადმხედველი მოსწავლეებისთვის პანსიონურ მომსახურებას საქართველოში მხოლოდ თბილისის 202-ე საჯარო სკოლა ასრულებს. 202-ე საჯარო სკოლაში დღეისთვის 49 მოსწავლე ირიცხება. პანსიონში სწავლება მიმდინარეობს როგორც ჩვეულებრივი, ასევე ბრაილის შრიფტით ნაბეჭდი სახელმძღვანელოებით.
წელს სკოლას 5 მეთორმეტეკლასელი ჰყავს. სამინისტროს ინფორმაციით, მათთვის საგამოცდო მასალა ბრაილის შრიფტზეა ადაპტირებული.
