ჟურნალმა Science-მა 18 ოქტომბერს სამეცნიერო სტატია გამოაქვეყნა სახელწოდებით - ’’სრული თავის ქალა დმანისიდან და ადრეული ჰომოს ევოლუციური ბიოლოგია". მისი ავტორები ქართველი მეცნიერები დავით ლორთქიფანიძე, აბესალომ ვეკუა და ანი მარგველაშვილი არიან.

დმანისის უმნიშვნელოვანეს აღმოჩენას ჟურნალი Science უკვე მესამედ უძღვნის ვრცელ სტატიას. 2005 წლის არქეოლოგიური გათხრებისას 1,8 მილიონი წლით დათარიღებულ ფენაში აღმოჩენილი თავის ქალა, ლაბორატორიულად 8 წლის განმავლობაში მუშავდებოდა. ამავე ინდივიდს მიეკუთვნება 2000 წელს აღმოჩენილი ქვედა ყბა. ეს ნიმუში ზრდასრული ინდივიდის ერთადერთი საუკეთესოდ შემონახული თავის ქალაა.

აკადემიკოსი აბესალომ ვეკუა დავით ლორთქიფანიძესა და ლეო გაბუნიასთან ერთად იკვლევდა აღნიშნულ თავის ქალას.

მეცნიერებს მიაჩნდათ, რომ აფრიკაში მცხოვრები ადამიანები, მილიონ ნახევარი წლის წინ იმ ტერიტორიაზე ვითარდებოდნენ და ნახევარი მილიონი წლის წინ გადაბარგდნენ ევრაზიაში. დმანისის არქეოლოგიური გათხრების შედეგად აღმოჩნდა, რომ დაახლოებით მილიონ 800 ათასი წლის წინ, საქართველოში უკვე ბინადრობდა ჰომინიდი, რომელიც მსგავსი იყო აფრიკული ჰომინიდისა. უფრო მეტიც, არა მხოლოდ ბინადრობდა, არამედ შთამომავლობაც კი შექმნა.

’’ჩვენ გვაქვს ჰომინიდის ყველაზე ღრმა მოხუცის თავის ქალა და ქვედა ყბა, რომელსაც არც ერთი კბილი არ გააჩნია, მაგრამ საინტერესო ის არის, რომ ამ ყბებზე კბილების ფოსოები ძვლის ქსოვილითაა შევსებული. ეს იმას ნიშნავს,რომ როცა ამ უძველესმა ადამიანმა კბილები დაკარგა, იმის მერეც გააგრძელა სიცოცხლე, მაშასადამე, ამ ადამიანზე ვიღაც ზრუნავდა. ჩვენ გვაქვს შუახნის ადამიანის თავის ქალაც და ქვედა ყბაც და გვაქვს მოზარდის ქვედა ყბა, რაც იმას ნიშნავს, რომ როცა ადამიანმა ფეხი მოიკიდა სამხრეთ კავკასიაში, განიცადა ტრანსფორმაცია და სწორედ აქედან გავრცელდა როგორც აზიისკენ (აღმოსავლეთში), ისე ჩრდილოეთისკენ. დღეს ერთ-ერთი ფრანგული ჟურნალი წერს, რომ საქართველოში აღმოჩნდა ევრაზიის ერთ-ერთი უძველესი ადამიანი, რომელიც არც გერმანელია, არც ფრანგი, არც ესპანელი თუ ინგლისელი... ის არის ქართველი. თუ მსოფლიოს ანთროპოლოგები ეჭვის თვალით უყურებდნენ და სკეპტიკურად უყურებდნენ ქართველი მეცნიერების აღმოჩენასა და დასკვნებს, დღეს ეს დასკვნები მსოფლიოში აღიარებულია,’’ ამბობს აკადემიკოსი აბესალომ ვეკუა.