"საზოგადოებრივი დამცველი" საარჩევნო უბნებზე დაფიქსირებული დარღვევების შესახებ ინფორმაციას ავრცელებს. ორგანიზაციის განმარტებით, კონფლიქტურ ზონებში მცხოვრები მოსახლეობის ნაწილს ხმის მიცემა ეზღუდება.

"მოსახლეობის ნაწილი, რომელსაც აქვს კონსტიტუციური უფლება, გააკეთოს არჩევანი, სამწუხაროდ, ჯერჯერობით ვერ ახერხებს ხმის მიცემას. დღეს ქარელისა და გორის რამდენიმე სოფელში საოკუპაციო ხაზს მიღმა დარჩენილი მოსახლეობა ვერ გადმოდის და ვერ აძლევს ხმას. პრობლემებია სოფელ დიცში, თამარაშენში და გუგუტიანთკარში," - განაცხადა ირინა ფუტკარაძემ.

გარდა ამისა, ქარელის №33 საარჩევნო ოლქში # 41 საარჩევნო უბანში (მოხისი) დამკვირვებელს საარჩევნო კომისიის თავმჯდომარე არ უშვებდა დაკვირვებელს საარჩევნო უბანზე, რის შესახებაც დაიწერა საჩივარი.

გორის № 32 საარჩევნო ოლქში, მეჯვრისხევის # 54 უბანზე დამკვირვებელმა დააფიქსირა, რომ იყო მცდელობა მართვის მოწმობის მეშვეობით ხმის მიცემისა, დამკვირვებელმა გააპროტესტა და სიტყვიერი გაფრთხილების შემდეგ პრობლემა აღმოიფხვრა. იმავე ოლქის № 66 საარჩევნო უბანზე მარკირების პროცედურის გარეშე იყო მცდელობა ამომრჩევლის გატარებისა, თუმცა დამკვირვებლის სიტყვიერი შენიშვნის შემდეგ აღმოიხრვა დარღვევა.

ორგანიზაციაში შედარებით სერიოზულ დარღვევად აფასებენ გორის № 32 საარჩევნო ოლქში კარალეთის № 100 საარჩევნო უბანზე დაფიქსირებულ შემთხვევას, სადაც ბიულეტენის შეკვრას თავზე არ აღმოაჩნდა სპეციალური ყუა. ამის შესახებ დამკვირვებლებმა სპეციალური საჩივარი დაწერეს.

"საზოგადოებრივი დამცველის" განცხადებითვე, გორის №32 საარჩევნო ოლქში კარბის №42 უბანზე საკონტროლო ფურცლის ჩაგდებისას დროის მითითება გამორჩათ და შემდგომ მოხდა ჟურნალში ჩანიშვნა, რის შესახებაც ასევე საჩივარი იწერება.