უზენაესი სასამართლო „რუსთავი 2-ის" საქმეს 21 ნოემბერს, ზეპირი მოსმენის გარეშე განიხილავს. ამის შესახებ ინფორმაციას ტელეკომპანია „რუსთავი 2" ავრცელებს.
„სამაუწყებლო კომპანია რუსთავი 2“ მოითხოვდა, რომ მაღალი საზოგადოებრივი ინტერესის გამო, ტელეკომპანიის საქმის განხილვა ზეპირი მოსმენით წარმართულიყო, თუმცა უზენაესმა სასამართლომ ეს შუამდგომლობა არ დააკმაყოფილა და საქმეს ზეპირი მოსმენის გარეშე განიხილავს", - ნათქვამია „რუსთავი 2-ის" ინფორმაციაში.
თბილისის სააპელაციო სასამართლომ ძალაში დატოვა თბილისის საქალაქო სასამართლოს გადაწყვეტილება „სამაუწყებლო კომპანია რუსთავი 2-ის" წილის მესაკუთრეებად ქიბარ ხალვაშისა (60%) და შპს „პანორამას“ (40%) ცნობის შესახებ.
„რუსთავი 2-მა" სააპელაციო სასამართლოში 3 ნოემბრის გადაწყვეტილება გაასაჩივრა, რომლის მიხედვითაც, პირველი ინსტანციის სასამართლომ დააკმაყოფილა ქიბარ ხალვაშის სარჩელი და „სამაუწყებლო კომპანია რუსთავი 2-ის" წილის მესაკუთრეებად ქიბარ ხალვაში (60%) და შპს „პანორამას“ (40%) ცნო.
„რუსთავი 2" აღნიშნული გადაწყვეტილების გაუქმებასა და საქმის პირველი ინსტანციის სასამართლოში ხელახლა განსახილველად დაბრუნებას მოითხოვდა.