„რესპუბლიკური პარტია" გაზის ტრანზიტის შესახებ რუსეთთან ხელშეკრულების გაფორმებას „ქვეყნის სუვერენიტეტის გასხვისების დასაწყისად" აფასებს.
პარტიის წევრის, თამარ კორძაიას თქმით, არავინ იცის, როდის გაზრდის რუსეთი გაზის საფასურს. მისი განმარტებით, ეს გადაწყვეტილება რუსეთისთვის ყველა ბერკეტის გადაცემას და საქართველოს პოლიტიკური ფასის დაკნინებას ნიშნავს. კორძაიას თქმით, „გაზპრომის თემა" წითელი ხაზია, რითაც ხელისუფლება ადასტურებს, რომ მას რუსული ინტერესები ამოძრავებს და რუსეთთან ურთიერთობის დათბობა სურს.
„არავინ გვიხსნის, რატომ არ შეეძლო რუსეთს სომხეთისთვის გაზის ალტერნატიული გზებით მიწოდება, ასევე საერთოდ თუ ვაწარმოებთ ირანთან გაზის მოწოდებაზე მოლაპარაკებებს" - თქვა კორძაიამ.
გაზის ტრანზიტის შესახებ ხელშეკრულებას, რომელსაც ენერგეტიკის სამინისტრო „გაზპრომთან" გააფორმებს, არ გაასაჯაროებს, რადგან იგი მთლიანად კომერციული საიდუმლოება იქნება. ამის შესახებ „ლიბერალს" ენერგეტიკის სამინისტროს პრესსამსახურში უთხრეს.
სამინისტრო: „გაზპრომთან" ხელშეკრულება კომერციული საიდუმლოებაა და არ გასაჯაროვდება
„გაზპრომთან" ხელშეკრულების ხელმოწერით დაზიანდა საქართველოს პოლიტიკური და ეკონომიკური ინტერესები, გაუარესდა ქვეყნის ენერგოსექტორი... რასაც, შესაძლოა, სამომავლოდ მთელი რიგი პრობლემები მოჰყვეს - პრეზიდენტის პრესსპიკერ ეკა მიშველაძის თქმით, გიორგი მარგველაშვილის აზრით, „გაზპრომთან" მიღწეული შეთანხმებით ქვეყნის ენერგოსექტორის მდგომარეობა გაუარესდა.
