დეკანოზ გიორგი მამალაძის ადვოკატმა მიხეილ რამიშვილმა ე.წ. მატროსოვის ციხესთან განაცხადა, რომ დეკანოზის დაკითხვა 4 საათი განმავლობაში გრძელდებოდა და ყველა იმ კითხვაზე, რომელიც დაუსვეს, დეკანოზმა პასუხი გასცა.
შეკითხვაზე, დაისვა კითხვები თუ არა სოსო ოხანაშვილთან დაკავშირებით და ფუგურირებდა თუ არა ის საქმეში, რამიშვილი პასუხობს:
„საქმეში სოსო ოხანაშვილთან დაკავშირებით ჯერ-ჯერობით კითხვები არ დასმულა. ოხანაშვილი მხოლოდ მაშინ დაკითხეს, როდესაც საქართველოში ჩამოვიდა გერმანიიდან“,- განაცხადა რამიშვილმა.
საპატრიარქოს იურისტის, ედიშერ ქარჩავას განცხადებით, სოსო ოხანაშვილი ერთ-ერთი მთავარი ეჭვმიტანილია. ამის შესახებ ადვოკატმა გაზეთ „კვირის პალიტრასთან“ მიცემულ ინტერვიუში განაცხადა.
„ყველას დაკითხვაზე ინფორმაცია არ მაქვს, მაგრამ ის პირი, ვისთანაც მამა გიორგის ახლო ურთიერთობა და კონტაქტი ჰქონდა, გამოძიებამ უკვე დაკითხა. დაცვის უფროსი მყავს მხედველობაში. ამ საქმეში ერთ-ერთი მთავარი ეჭვმიტანილი, ვისთანაც მას ახლო ურთიერთობა ჰქონდა, არის სოსო ოხანაშვილი. ის ტელევიზიითაც საუბრობდა საშიშროებაზე, რომ შესაძლოა დააკავონ“, - განაცხადა ედიშერ ქარჩავამ.
