ხანდოში ქსანი-სტეფანწმინდის ელექტროგადამცემი ხაზის პროექტის გასაპროტესტებლად რამდენიმე სოფლის მოსახლეობა შეიკრიბა.
ფასანაურის მკვიდრი ბადრი დავითური „ლიბერალთან“ საუბრისას ამბობს, რომ სოფელში 150-მდე ადამიანია შეკრებილი, რომლებიც ტრაქტორებს გზების გაჭრის საშუალებას არ აძლევენ.
„დავიღალეთ მშვიდობიანი აქციებით. ვის არ მივმართეთ?! პატრონი არ ჰყავს ამ მხარეს. გამგებელს ვთხოვეთ, აქციაზე მოსულიყო, პასუხად კი მივიღეთ, მე როცა მომინდება, მაშინ ამოვალო. არ მივცემთ სამუშაოების გაგრძელების საშუალებას. მორიგეობის დაწესებას ვაპირებთ“ - ამბობს დავითური.
ქსანი-სტეფანწმინდის დამაკავშირებელი 500 კვ-იანი ელექტროგადამცემი ხაზის პროექტის წინააღმდეგ ენერგეტიკის სამინისტროსთან საპროტესტო აქცია 8 მაისს გამართეს.
„ეს ჩვენთვის დიდი ტრაგედიაა" - ასე აფასებს ჭართლიდან, ფასანაურიდან და ხანდოდან ჩამოსული მოსახლეობა პროექტს, რომელიც, მათი თქმით, განხორციელების შემთხვევაში, ადგილობრივ მცხოვრებლებს ეკოლოგიური კატასტროფის წინაშე დააყენებს.
სამშენებლო სამუშაოებს კომპანია „ენერგოტრანსი" ახორციელებს, რომელიც სს „საქართველოს სახელმწიფო ელექტროსისტემის" შვილობილი კომპანიაა. ამ უკანასკნელის ვებგვერდზე ვკითხულობთ, რომ საწყის ეტაპზე, ელექტროგადამცემი ხაზი იმუშავებს 110 კვ. ძაბვაზე და მოემსახურება მცხეთა-მთიანეთის რეგიონში არსებული და მშენებარე ჰიდროელექტროსადგურების მიერ გენერირებული ელ. ენერგიის ინტეგრირებას საქართველოს ენერგოსისტემაში.
„შემდომ ეტაპზე, განსაზღვრულია ხაზის დაკავშირება რუსეთის ენერგოსისტემასთან; შესაბამისად, სტეფანწმინდის მიმდებარე ტერიტორიაზე 500/110 კვ. ქვესადგურის მოწყობა და ხაზის გადაყვანა 500 კვ. ძაბვაზე. მისი გამტარუნარიანობა იქნება 1100 მგვტ. რაც შექმნის საქართველოს, რუსეთის, სომხეთისა და ირანის ენერგოსისტემების დამაკავშირებელ ენერგეტიკულ მაგისტრალს და ხელს შეუწყობს საქართველოს ელექტროგადამცემი ქსელის სტაბილურობასა და ფართომასშტაბიანი სავაჭრო ურთიერთობების დამყარებას საქართველოს, რუსეთს, სამხრეთ კავკასიის სხვა ქვეყნებსა და „შავი ზღვის ელექტროგადამცემი ქსელის“ ქვეყნებს შორის" - ნათქვამია ორგანიზაციის განცხადებაში.
11 ნოემბერს „მწვანე ალტერნატივამ" გარემოს დაცვის მინისტრის მიერ პროექტზე გაცემული ეკოლოგიური ექსპერტიზის დადებითი დასკვნა გაასაჩივრა. ორგანიზაციაში მიიჩნევენ, რომ საფრთხეები, რომლებიც შესაძლოა პროექტს მოჰყვეს, სათანადოდ არ არის შესწავლილი.
„პროექტით არ იყო გათვალისწინებული ელექტრომაგნიტური ველისგან დაცვის ღონისძიებები. არ იყო რისკი სათანადოდ შესწავლილი, თუმცა სამინისტრომ მაინც გასცა დადებითი დასკვნა, რომელიც მშენებლობის ნებართვის ნაწილია. დღეს გაუქმებულია ის რეგულაცია, რომელიც სპეციალური დაცვის ზონას აწესებდა ადამიანებისთვის. მოქმედი ნორმა გადამცემ ხაზს იცავს ადამიანებისგან და სწორედ ეს ნორმაა გამოყენებული. როცა 30-მეტრიან დერეფანზე მიუთითებენ, ეს ელექტროგადამცემი ხაზის დასაცავადაა. ძველი ნორმა ითვალისწინებდა 240-მეტრიანი დაცვის ზონას და იგი 2007 წელს გააუქმეს, რადგან სხვა კანონში უნდა ასახულიყო. თუმცა ასე არ მოხდა" - ამბობს „ლიბერალთან" საუბარში ორგანიზაციის წარმომადგენელი ნინო გუჯარაიძე.
შეკითხვაზე, თუ რა ზიანის მომტანი შეიძლება იყოს შესაბამისი ელექტროგადამცემი ხაზი, გუჯარაიძე პასუხობს, რომ ამ საკითხზე მეცნიერებს ერთიანი მოსაზრება არ აქვთ, თუმცა მსოფლიო ჯანდაცვის ორგანიზაცია წინდახედულობის პრინციპით ხელმძღვანელობს.
„არსებობს 30 000-ზე მეტი კვლევა, რომელთა ნაწილი ამბობს, რომ მან შეიძლება გამოიწვიოს, კიბო, ლეიკემია, ნეიროდეგენერაციული პროცესების ხელშეწყობა, განსაკუთრებით კი ბავშვებში. რადგან ამ საკითხზე არ არსებობს შეთანხმება, მსოფლიო ჯანდაცვის ორგანიზაციის რეკომენდაციაა, რომ იგი მაქსიმალურად შრს იყოს დასახლებული ტერიტორიისგან" - ამბობს გუჯარაიძემ.
„მწვანე ალტერნატივის" სარჩელის განხილვა სასამართლოში 22 მაისს განახლდება.
