მეუფე პეტრემ საპატრიარქოს იურისტის ედიშერ ქარჩავას განცხადებაზე, რომ მეუფე პეტრეს პატრიარქის მოკვლის სურვილი ჰქონდა საზოგადოებრივ მაუწყებელთან განაცხადა, რომ ეს არის სერიოზული ცილისწამება. მისი თქმით, მან არა მარტო საპატრიარქოში, არამედ ქვეყანაში არსებული უსამართლობის წინააღმდეგ აიმაღლა ხმა.
„ეს არის სერიოზული ცილისწამება, ეს არის ძალიან დიდი გვირგვინი ნეტარებისა და ღმერთმა ღირსეულად მატარებინოს ეს გვირგვინი და ეს ჯვარი“, - აღნიშნა მეუფემ საზოგადოებრივ მაუწყებელთან ინტერვიუში.
„არა მარტო „ციანიდის საქმეზე“, არამედ საპატრიარქოში და ქვეყანაში არსებული უსამართლობის წინააღმდეგ ავიმაღლე ხმა და მიმაჩნია, რომ ამით ჩემი ეროვნული, სახელმწიფოებრივი და მღვდელმთავრული ვალი მოვიხადე“, - განაცხადა მეუფე პეტრემ.
საპატრიარქოს იურისტის ედიშერ ქარჩავას თქმით, მეუფე პეტრე ცაავა,სავარაუდოდ, აქტიურად იყო ჩართული პატრიარქის მოკვლის მცდელობაში.
„ვასახელებ მეუფე პეტრეს, რომ მას სურვილი ჰქონდა, რომ პატრიარქი მოეკლა. მეუფე პეტრე, სავარაუდოდ, აქტიურად იყო ჩართული პატრიარქის მოკვლის მცდელობაში. რაც შეეხება მის თანამზრახველებს, კონკრეტულ სახელებსა და გვარებს ვერ დავასახელებ, თუმცა ერთ-ერთი ახლა ციხეშია. საუბარია გიორგი მამალაძეზე“, - განაცხადა ედიშერ ქარჩავამ.