პროკურატურამ შოთა პაკელიანი დაზარალებულად ცნო. ამის შესახებ ინფორმაცია „ლიბერალს" უწყებაში დაუდასტურეს. 

„თეთრი ხმაურის მოძრაობის“ იურისტის, პაკელიანის ადვოკატის, გიორგი მახარაძის თქმით, დაზარალებულის სტატუსი მათ მისცემთ წვდომას გამოძიების მასალებზე, რათა უფრო ეფექტიანად დაიცვან  მისი უფლებები გამოძიების ფარგლებში.

„ის ბრალდებები, რასაც ჩვენ ვუყენებთ პოლიციელებს, ამ კადრებითაც დასტურდება. დასტურდება რამდენიმე დანაშაულის ფაქტიც პოლიციელთა მხრიდან. ვგულისხმობ, დოკუმენტის გაყალბებას, მტკიცებულებების ფალსიფიცირებას, კომპიუტერულ მონაცემებში უკანონო შეღწევას და ა.შ.“, - ამბობს მახარაძე „რუსთავი 2-თან“ საუბრისას.

შოთა პაკელიანი 2017 წლის 23 მარტს დააკავეს. ის პოლიციელებს „ბიოს“ ჩადებასა და სასტიკ ცემაში ადანაშაულებდა. 

„ლიბერალს“ წყარომ ისანი-სამგორის სამმართველოს პოლიციის მე-7 განყოფილების შიდა კამერების მიერ გადაღებული ვიდეოკადრები მიაწოდა. წყაროს განცხადებით, მასზე ასახულია შოთა პაკელიანის ჩხრეკის, შემდეგ კი მისი გაშიშვლების გარემოებები.

ვიდეოკადრები ► დაკავებულ პაკელიანის გაშიშვლება და ზეწოლა პოლიციის განყოფილებაში

„ლიბერალის“ ვებგვერდზე ვიდეოკადრების გამოქვეყნების შემდეგ, რომელზეც პოლიციის განყოფილებაში შოთა პაკელიანის გაშიშვლებისა და ზეწოლის ამსახველი კადრებია ასახული, ისანი-სამგორის მე-7 განყოფილების უფროსი 22 ივნისს თანამდებობიდან გათავისუფლდა.